ISL - Zaninah final khelh a ni dawn ta

Indian Super League final chu zanin dar 7:30 hian khelh a ni dawn ta a, ATK Mohun Bagan leh Bengaluru FC ten champion nih an inchuh dawn.

Team pahnih hian knockout round paltlangin semifinal an lut a, Bagan hian league round-a pahnihna Hyderabad chu pet chhuakin, Bengaluru hian league winner Mumbai FC an pet chhuak thung - penalty hmang ve vein an chak.

Bagan hian Mizo midfielder K. Lalṭhathanga (Puitea) leh Lalrinliana Hnamte (Terina) an kawl a, Bangalore club-in tun hnaiah Mizo player Lalremtluanga Fanai ziak lut mah se, a inlan a rinawm lo.

Bagan an ṭang a, Nilaini khan final khelhna tur Goa an thleng fel der tawh. Bagan midfielder Puitea chuan, "Final hi chu sawi thiam a harsa ṭhin - boruak a sang tawh a, chance kan nei ve veah ka ngai," tiin Vanglaini a hrilh.

Champion tum

Puitea chuan, "Bengaluru kaltluan lai a ni a, chutihrual chuan tawnhriat nei ṭha player kan kawl tam avangin beiseina kan nei. Final thlen a harsa a, final ber kan thleng tawh a nih chuan champion kan tum ang chu," a ti.

Puitea hian season hmasa khan Kerala Blasters chu final a hruai thleng a, tun season-ah Blasters tan season bul ṭan leh mah se January khan Bagan hi a pan a, final a lut leh ta.

Bethlehem Vengthlang tlangval chuan, "Ka season chhiat ber ṭum ni lo mah se a harsat ber ṭum ni hialin ka hria a, chutiang kara a zawna final luh hi a ropui ka ti.

"Pathian zarah champion ngei ka tum a, Mizo mipuite min lo ṭawngṭaipui turin ka sawm," a ti a, "Kan veng Bethlehem Vengthlang min thlawpnaah ka lawm hle," a ti bawk.

Bagan an ṭha

Dungtlang tlangval Terina chuan, "Kan inbuatsaihna a ṭha a, ka huphurh lo. A nihna takah chuan kan team hi ka dahsang zawk mah," tiin Vanglaini a hrilh a, a pianna khua Dungtlang leh amah chher hriamtu Chanmari veng chungah lawmthu a sawi bawk.

Terina'n Bagan a dah sang zawk hi a awm lo hran lo. Kolkata club keeper Vishal Kaith hian tun season match 23-ah vawi 12 clean sheet neiin, ISL season khata clean sheet nei hnem ber record a siam.

Kaith hmaa ding turin Asish Rai, Pritam Kotal, Slavko Damjanovic leh Subhasish Bose te an awm a, midfield-ah Hugo Boumous leh Motherwell captain ni tawh Carl McHugh te an awm avangin an ngaihtuahawm lo.

Tlarhmaah goal 10 leh assist vawi sarih nei tawh Dimitri Petratos chu innghahna a ni leh dawn a, ani thlawp tur hian Manvir Singh, Liston Colaco leh Ashique Kuruniyan te ho chu duhthlan tur an awm bawk.

Mahse...

Hming aṭanga teh chuan Bagan an ṭha zawk a, mahse, Bengaluru hi an kaltluang - match 10 zet a zawnin an chak a, match hnuhnung berah Mumbai ngam lo mah se inkhel pahnih belhkhawmah an inhnehtawk a, penalty hmangin an tlang ta tho.

Terina chuan, "An kaltluang em em a, hei hi kan tan a harsa lai tur chu a ni," a ti a, team kaltluang lai hneh a harsat thu a sawi - Bengaluru hian boruak sangah tawnhriat nei ṭha Sunil Chhetri an nei a, Fiji captain Roy Krishna a awm bawk.

Tlarhnungah Sandesh Jhingan a la rintlak reng a, Australian defender Aleksandar Jovanovic, Roshan Naorem leh Prabir Das an awm a, si ban nghak lah ania aia duhthlan tur tam chuang lo Gurpreet Singh Sandhu a ni.

Midfield-ah Javier Hernandez leh Suresh Wangjam an pawimawh dawn bawk - zaninah final hmuhnawm en tur a awm dawn e.