El Clasico; Real tan tlawm a thiang lo!

Real Madrid-in Champions League last 16 aṭangin ropui takin Liverpool an pet chhuak zo chiah a, duh anga an hahdam hmain El Clasico an khelh a ngai zui dawn.

Pathianni zan dar 1:30-ah Real hian an hmelma kumhlun Barcelona an lenchilh dawn a, La Liga nomawi humhim an duh a nih chuan Nou Camp-ah an tlawm a thiang tawh lo.

Barcelona hian league match 25-ah point 65 neiin hma an hruai mek a, an hnuai chiaha awm Real ai hian point kuain an sang zawk - Carlo Ancelotti naute tan tun hi an inkar sawr zim a, Barca tana pressure siamna remchang a ni.

Hmelma kumhlun

Tun season chu Barca hi Real tan an hnawksak hle - Spanish Super Cup final-ah an ngam lo a, Copa del Rey semifinal first leg-ah an ngam lo a, La Liga-a an phak loh awmchhun an ni mek bawk.

Hetiang boruak karah hian Barca-in chanchin lawmawm lo an nei a, referee hnena thamna sum peah puh an ni. Real Madrid an lo lang vat a, Barca puhna chu thuneituten thutlinga an pawm hunah thuneitute an thawhpui tur thu an sawi.

Barca tan chuan an mualphona belhchhah tura Real lo lang hi 'a na' takzet a, khelmualah an hmelma club hi awm dan mawi zirtir an châk dawn.

Benzema a dam

Liverpool lakah Karim Benzema inhliam mah se, French striker hian El Clasico a khelh theih tur thu a sawi a, amah thlawp tura Vinicius Jr leh Federico Valverde an awm bawk avangin tlarhmaah an ngaihtuahawm lo.

Barca tan tun season-a goal 25 khung tawh Robert Lewandowski chu innghahna a ni leh dawn a, Ousmane Dembele a la inhliam avangin Raphinha leh Ferran Torres ten an thlawp tura ngaih a ni.

Catalan club tan midfielder Pedri dam tawh mah se, a inlan thei ang em, sawi theih a la ni lo a, Real lamah David Alaba a la inhliam avangin Ancelotti-a'n tun hnaia left back-a a hman Eduardo Camavinga chu Ferland Mendy aia a ring leh a nih pawhin a mak lo ang.