Kompany-a'n City a la enkawl dawn - Guardiola

Manchester City manager Pep Guardiola chuan club legend Vincent Kompany-a'n Etihad Stadium-ah manager hna a la thawh ngei tur thu a sawi a, a player hlui hi a fak hle. Zanin dar 11:15 hian Man City-in Kompany enkawl Burnley an mikhual dawn a, Pep-a hmaah City captain hlui hian fiahna hautak a hmachhawn dawn.

Spanish manager Pep-a hnuaiah Man City-in nomawi ṭhahnem tak an chawi a, FA Cup erawh vawi khat chiah an la chawi. Chutihrualin City hi champion rinkai an ni a, season ṭha ber an hmang lo chungin treble champion thei an la ni a, dah hniam theih an ni lo.

Champions League-ah Erling Haaland-a'n goal nga ngawt a khung a, Kevin de Bruyne a rawn chet ṭhat leh bawk avangin Burnley tan Man City hneh a harsa dawn. Chutihrualin Clarets hian Kompany hnuaiah season ṭha tak an hmang a, Championship-ah hmahruaitu ni mekin point 13-in an sang fal.

Kompany-a'n hna ṭha tak a thawh miau avangin Pep-a'n City enkawltu tur a tih pawh hi a mak lo. Chutihrualin Kompany chuan, "City chuan manager ṭha ber a nei tur a ni a, kei chu ka ni lo. Kei chu Championship club enkawltu ka ni a, Premier League kan khelh hma chu C'ship manager ka la ni rih dawn," tiin a club hlui enkawl tlak a nih loh thu a sawi.

Burnley manager Kompany chuan sawi chhunzawmin, "City hian khawvela manager ṭha ber an kawl a, kum 10 dang cham leh turin ka duhsak. Pep hi a chhuak a nih pawhin manager ṭha ber dawttu neih an phu a, kei chuan ka hlat lutuk," tiin Pep-a fak. Zanin hian manager pahnih inzah tawn tak an inkhel dawn a, Pep leh Kompany vangin City leh Burnley inkhel tur hian ngaihven a hlawh ang.

City tan chanchin lawmawm a awm a, Julian Alvarez chuan kum 2028 thleng atan conract a pawtsei. English club hian January 2022 khan pound maktaduai 14-in Alvarez hi River Plate aṭangin an la a, Argentina-in World Cup nomawi an chawina kawngah player pawimawh a nih avangin a hlutna hi a let fein a pung tawh ang.