Haaland tan fiahna tak a hnai

Manchester City striker chhuanvawr Erling Haaland-a'n Premier League ni loin, Champions League nomawi chawi tura English club-in an lakluh thu a sawi a, a kalkawng erawh a awlsam dawn lo - quarterfinal-ah Bayern Munich an tawng dawn.

Nimin tlai khan Nyon, Switzerland-ah Champions League quarterfinal-a inhmachhawn tur hi pawh a ni a, European champion la ni ngai lo City leh Bayern hi semifinal luh inchuh tura pawhfuh an ni - Bayern hi Paris Saint-Germain petchhuaktu an ni, tih theihnghilh loh a ṭha.

Chelsea boss Graham Potter-a'n Ningani zan khan club buatsaih, fan-te nena hun hmannaah, "Champions League nomawi chawi kan tum ang," tiin a sawi a, mahse, an kalkawnga champion lai Real Madrid paltlang erawh a awlsam lo ang.

Real hi Champions League last 16-a Liverpool nghaisa zo hlim an ni a, Potter-a tan a ṭawngṭai channaa chhiar tel an harsa khawpin a rinawm.

Italian club pathumin Champions League quarterfinal an lut a, mahse, Napoli, Inter Milan leh AC Milan aṭangin a tam berah club pahnih bakin semifinal an lut dawn lo - AC Milan leh Napoli inhmachhawn dawn vang a ni a, Inter hian Benfica an hmachhawn dawn thung. Hetihrual hian Italian club pakhat talin semifinal an khel dawn, tihna a ni tel nghal bawk.

Champions League quarterfinal hi double leg-a khelh tur a ni a, first leh hi April 11 leh April 12-a khelh tur niin, April 18 leh 19-ah second leg khelh a ni dawn thung a ni.