Europa League Quarterfinal-ah Man United, Juve, Roma leh Sevilla

Europa League quarterfinal-ah club lian Manchester United, Juventus, AS Roma leh Sevilla te an inpetling a, anni bakah hian Sporting Lisbon, Union Saint-Gilloise, Bayer Leverkusen leh Feyenoord te an la dam bawk.

Erik Ten Hag-a hoten nomawi beiseina chhi nung turin Real Betis chu an hneh nawn a, Old Trafford-a 4-1 a an hneh tawh hnu hi Benito Villamarín-ah Marcus Rashford-a goal hmangin 1-0 in an hneh.

Rashford hian tun season match 43 aṭangin goal 27 a khung tawh a, assist vawi kua a nei bawk. English forward hi kum 25 leh ni 136 mi niin Man United player zinga Europe inelnaa goal 25 khung tling thei naupang ber a ni bawk.

United tlarhnung hi inkhelh ṭantirh lamah pawp deuh mah se lawmna tur ṭhahnem tak an nei. Facundo Pellistri-a'n Man United a zawm aṭanga ni 893 hnuah bul a ṭan ve ta a, Uruguayan forward hi an rintlak viau.

Captain Harry Maguire pawhin bul a ṭan a, goal an chhuah lo. Ten Hag-a'n second half-ah Rashford, Bruno Fernandes leh Aaron Wan-Bissaka te hahchawlhna hun pein a thlak. Man United hian March 19, Pathianni hian FA Cup-ah Fulham an mikhual ang.

Juventus-in Freiburg lakah club lian an ni tih an lantir a, Italian club tan Dusan Vlahovic leh Federico Chiesa ten hun chanve hmalam leh hnulamah an khung. Old Lady hi aggregate-ah 3-0 in an chak a, champion rinkai zinga mi an ni.

Nikuma Europa Conference League-a champion AS Roma-in Europa League-ah pawh champion ngei an tum tih khelmualah an lantir a, Jose Mourinho hoten an muala 2-0 a an hneh tawh Real Sociedad chu khualmualah goal awm loin draw. Mourinho-a'n tlarhnung rem phui a la thiam reng a, knockout inelnaah goal venhim thiam hi a hlu ṭhin.

Europa League-a record nei ṭha ber Sevilla-in Fenerbahce 1-0 in hneh lo mah se an muala 2-0 a an hneh tawh avangin quarterfinal an lut tho. UEL-ah champion tur hriatthiam a har a, chutihrualin champion rinkai zinga mi Arsenal tla erawhin boruak alh chho tur a ti nep hret ang.