FIFA President atan Infantino bawk

Football khawvela thuneitu sang ber FIFA chuan President atan President ṭang lai Gianni Infantino bawk an thlang nawn a, FIFA President ni tur hian Infantino hian chuhtu a nei lo a ni.

Rwanda khawpui Kigali-a FIFA Congress-ah Infantino hi President atan thlan nawn a ni a, FIFA hnuaia ram 211 aiawhte chuan ding chunga kut bengin Infantino President nih nawn lehna hi an lawmpui a ni.

Infantino chuan thlan a nih zawhah football chu mi tam zawkin an khelh theih nana hmalak a ṭul thu a sawi a, khawvel hmun tam zawkah football chu an la khelh nasat tawk loh thu a sawi.

FIFA chuan tun hnai khan team 48 inelna tur World Cup 2026-ah thuthar an nei a, a tira group 16-a team pathum ṭheuh dah an tum chu group 12-a team pali ṭheuh awm turin an ruahman.

He ruahmanna avang hian match 80 chauh khelh tur chu match 104-ah a kaisang a, kum tina khelh ṭhin Club World Cup chu June 2025 aṭang chuan kum li dana khelh tur niin, club 32 inelna tur a ni tawh dawn bawk.

Hetihlai hian FIFPRO, Professional Footballers Association leh La Liga chuan FIFA ruahmanna hi sawiselin, mahni ṭanghma hai leh, player-te dinhmun ngaihtuah loah an puh a ni.

Infantino chuan, "Football khel nasa lutuk anga sawi thawm ka lo hria a, hmun ṭhenkhatah chuan an sawi hi a dik mai thei. Mahse, hmun zawng zawngah erawh a ni lo.

"A nihna takah chuan khawvel hmun dang tam zawkah, football hi an la khel tam tawk lo a ni. Inelna tihtlem aiin mi tam zawkin football an khelh hi kan mamawh a, football hi hmun tinah ṭhang se kan duh a ni," a ti.

Infantino chuan hmeichhe Club World Cup leh FIFA World Series chu kum hnih dana neih chungchang pawh an sawi thu a sawi a, World Cup 2026 hi United States, Mexico leh Canada-in an thlen tur niin, team 32 inel ṭhin chu team 48-ah tihsan a ni.