Sakhming chul lo tur a hming Lianzuala
India ramah football hmanga eizawng footballer sang tel fe an awm a, chuta league sang ber chu Indian Super League a ni - chu league sang ber chu footballer zawng zawng tan khelh phak chi a ni lo a, ISL khelh phak ringawt pawh footballer tan inchhuanna tham a ni.
Chu league ngaihsan hlawh leh ngaihven hlawhah chuan club 11 an inel a, club tinin player 35 aia tam lo leh player 25 aia tlem lo an nei thei - tun dinhmuna ISL squad-a player awm zat chu 317 a ni.
Player ṭhenkhat chu Indian footballer beiseiawm tak tak an ni a, ṭhenkhat chu Indian football-a sulhnu hraw pui pui hnutchhiah tawh an ni a, ram pawn player-te phei chu international football-a tawnhriat nei ṭha, European top flight league thlenga khel tawhte an ni hlawm.
Chutianga player langsar leh ropui, sum tam tak hlawh rual karah chuan a hming Lallianzuala Chhangte a awm a, chu player chu ISL 2022-23 season-a player ṭha berah thlan a ni - i chhiar dik e, Mizo tlangval chu ISL-ah Hero of the League a ni a, Mumbai City forward Lallianzuala Chhangte hi a hming hriatreng a ni tawh ang.
Sulhnu ropui
Lianzuala hian season a hmang ṭha takzet - ISL season ṭan a nih hma khan Durand Cup-ah inlanin, match sarihah goal sarih khungin top scorer a ni a, assist vawi thum a nei bawk. Mahse, hei hi a bul ṭanna chauh a ni.
Lunglei tlangval hian ISL a herchhuah meuh chuan match 22-ah goal 10 khungin assist vawi ruk a nei a, Indian player zingah ani aia goal khung hnem zawk an awm lo - penalty vawi khat chiah a pet a, penalty pet ziah ta se, top scorer a ni tel hial ang.
Lianzuala hian goal a khung a ni satliah lo a, a team-in an mamawh lai takin goal a khung ṭhin - goal 10 a khung zinga goal ruk hi Mumbai an hnufual lai emaw, an khingpui nen an inhnehtawk laia a khung zel a ni a, Mumbai-in league hmahruaitu ni chunga season an khar nan a thawhhlawk hle.
Leitlangpui tlangval hi Indian player zingah legend Sunil Chhetri tih loha ISL player of the season ni thei awmchhun a ni a, he award dawng tur hian Mumbai tana a khelhpui Jorge Pereyra Diaz, ATK Mohun Bagan forward Dimitrios Petratos, East Bengal captain Cleiton Silva leh Bengaluru rawlthar duhawm Sivasakthi Narayanan te a khum.
Mang ramah
Lianzuala'n award a dawng tih a hriat rualin Vanglaini chuan Mizo tlangval hi a be pawp nghal a, Lianzuala chuan, "A nihna takah chuan hetiang hi chu ka beisei bik lo. Mahse, ka rin Pathian hian ka tan thil ṭha tak min dahsak a ni tih chu ka hria. Engtikah nge chu chu a lo thlen dawn kei chuan ka hre lo a, mahse, beisei aia hmain ka ṭawngṭainate chu chhanin a awm a, ka tan chuan mumang ang mai a ni," a ti.
Lianzuala chuan sawi zawmin, "Golden Ball ka dawng tih ka hriat khan Pathian hnenah lawmthu ka sawi nghal. A nihna takah chuan ISL Emerging Player of the League dawnte hi ka châk ve ṭhin a, mahse, phu ve nia ka inhriat chang pawha ka dawn ngaih loh avangin hrehawm ka ti ṭhin hle.
"Mahse, ka thinlungah hian Thufingte 3:5-6 thu "I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zel ang che," tih hi a lo ri ṭhin a, "I tan thil ṭha zawk ka dahsak che a, nghak hram rawh," tiin min hrilh ṭhin ni ber hian ka hria.
"Chuvang chuan he award ka dawng tih ka hriat khan Pathian rinawmzia leh a thutiama ding nghet ṭhin Pathian a nihzia hi chiang takin ka hre chhuak leh a ni," a ti a, a lawmna chu thua sawifiah chi a ni lo.