Kompany leh a pu Pep te an la inthlau deuh

Vicent Kompany-a'n Championship-ah a club enkawl Burnley chu a chung berah awmpui mah se a club hlui Manchester City hmachhawn tur chuan an la nem deuh. Inrinni zan khan Etihad Stadium-ah FA Cup quarterfinal khelh a ni a, Pep Guardiola-a hoten 6-0 in an sawp.

Erling Haaland chuan ni nga chhung lekin hattrick vawi hnih a siam a, Norwegian striker hian tun season-ah goal 42 a khung tawh. City tan Julian Alvarez-a'n goal hnih a khung a, Cole Palmer-a'n goal khat a khung ve bawk.

Goal khung khawl

Kum 22 mi Haaland-a'n English club tana a khelh hmasak ber season-ah hattrick vawi ruk a siam tawh a, City legend Sergio Aguero-a'n kum 10 chhunga a hattrick siam chanve a siam der tawh.

City hian FA Cup leh Champions League final an thleng a nih phei chuan match 18 kheh tur an la nei dawn a, goal 42 khung tawh Haaland tan goal 60 khung tlin hi thil theih a ni.

Premier League awm hnua English club tana season khata goal khung tam ber record Ruud van Nistelrooy leh Mohamed Salah te siam goal 44 tluk pha turin Haaland-a'n goal hnih chiah a mamawh tawh a, a inhliam a nih ngawt loh chuan a khum ngei dawn tih a chiang.

Burnley boss Kompany chuan, "Hmasawn zel tura a awmna tur takah a awm a, coach ṭha tak leh rilru dik pu a neih avangin hma a sawn zel ang. Player ṭha bik ka khelhpui tawh a, chutiang huangah chuan a tel. Hetiang player-te hi chu dan an harsa a ni," tiin a sawi.

Premier League legend Alan Shearer pawhin, "Haaland hi a ṭha chungchuang. Goal a khung loh chuan a mu thei lo a, khung belh zel a duh. A team awmna hian goal khungna tur chance an siamsak ṭha bawk. Goal 50 aṭanga 60 thleng pawhin a khung thei ang," tiin City striker hi a fak hle.

Khual ṭha chu

Man City-in an club legend Vicent Kompany chungah ṭhat an chhuah a, inkhelh ṭan hmaa a hming an puan laiin standing ovation an pe. Inkhelh ṭan hnuah erawh Burnley leh City an inthlau ta deuh.

Clarets hian City khelmualah hian chak an harsat hrim hrim a, an chak hnuhnun ber pawh Maine Road-ah khan niin, kum 1963 daih tawh a ni. Kompany-a'n inzir belh tur a nei a, goal ruk lawih an chhuah avangin a pu hlui Pep Guardiola hnen aṭangin thil tam tak a hriat belh ang.

Inkhelh banah Kompany hian City tana a khelhpui ṭhin player-te chu chibai a buk. Belgian manager Kompany hian Clarets hi Premier League a kaipui ngei dawn a, season thara Etihad Stadium an tlawh hunah FA Cup-a an mualphona hi inzir nan hman ngei a tum dawn a ni.