Bagan-in vaibelchhe ruk an dawng

Indian Super League final chu Pathianni zan khan khelh a ni a, ATK Mohun Bagan-in Bengaluru hneha champion nomawi an chawi avangin vaibelchhe ruk an dawng - final-a chak zo ta lo Bengaluru hian vaibelchhe 2.5 an dawng thung.

ISL league round-a hmahruaitu Mumbai City chuan vaibelchhe 3.5 an dawng thung. Mimal chawimawina ngaihhlut hlawh ber Hero of the League award chu Mumbai forward Lallianzuala Chhangte-in a dawng a, Odisha forward Diego Mauricio chuan goal 12 khungin top scorer a ni.

Brazilian forward Maurício bakah hian Bagan striker Dimitri Petratos leh East Bengal forward Cleiton Silva te chuan goal 12 khung ve mah se minute khel tlem ber Mauricio-a'n Golden Boot a dawng.

Emerging Player of the League-ah Bengaluru forward Sivasakthi Narayanan thlan a ni a, dawng thei zingah Mumbai City midfielder Lalengmawia Ralte leh Odisha forward Isak Vanlalruatfela tel mah se an dawng phak ta lo.