Atletico-in goal thum an khung

Diego Simeone enkawl Atletico Madrid-in season tharah Champions League khelh an tum tih thiltih hmangin an lantir a, an mikhual Valencia chu 3-0 ngawtin an sawp - La Liga table-a pathumna dinhmun an luah chu an sawhnghet zel.

Atletico tan hian Antoine Griezmann, Yannick Carrasco leh Thomas Lemar te chuan goal khat ṭheuh an khung a, hun tawp thlenga goal dang lut loin mualneitu team hi an chak chiang hle.

Minute 23-naah Griezmann hian hnai set sawt aṭangin goal hmahruai a khung a, second half ṭan aṭanga minute linaah Carrasco chuan belhchhahin, minute 67-naah Lemar chuan a tawp a khar.

Season bul ṭan ṭha lo Atletico-in league match thum chhung chu a zawnin hnehna an chang ta a, coach Diego Simeone chuan, "Kan khelh ṭhat avangin ka lawm a, he team leh group hian a ṭha thei ang berin inelna an hmachhawn ve ta," a ti a, tun hnaia result an nei ṭha chu a lawm hle.

Atletico hian league match 10 chhung chu a zawnin tlawm an nei ta lo a, table-ah pathumna dinhmun luahin point 51 an nei - pahnihna Real Madrid chu point nga chiahin an phak lo tawh a, nizana Real result a zirin an inthlauhna erawh danglam leh thei a ni. Real hian nizan khan Barcelona nen league match an khel a, he thu buatsaih a nih lai hian result kan hre hman lo.