Leeds-in relegation zone an chhuahsan

Premier League relegation battle a 'hot' chho zel. Inrinni zan khan Leeds United-in Molineux Stadium a luhchhuah a, Wolves 4-2 in an hneh. Inkhel boruak a sang a, mualneitu player Jonny leh Matheus Nunes te chu hnawhchhuah niin inkhelh a tawp meuh chuan player pakua chauh an ni.

Whites tan Jack Harrison, Luke Ayling, Rasmus Kristensen leh Rodrigo Moreno ten goal khat ṭheuh an khung a, 2-0 a nih laiin Wolves tan Jonny-a'n a khung a, 3-1 a nih hnuah Matheus Cunha-a'n khung leh mah se result a thlak danglam pha lo.

Javi Gracia kaihhruai Leeds tan point thum hlu bik a ni a, match 27-ah point 26 hmuin 14-naah an invawrhchho. Leeds hi invawrhchho dawrh mah se table mawngphaha awm Saints-in Tottenham an chelh thei a, an inthlauhna hi point thum chauh a nih avangin a dinhmun a him chuang lo.

Tun season Premier League-ah 12-naa awm Crystal Palace leh a hnuai lama awm zawng chu relegation battle-ah an tel vek a, Championship-a tla tur hi hriatthiam a la har hle.