Mizoram Police an champion

Mizoram Police chu a vawi khat nan All India Police Football Championship-ah an champion.Nimin khan Bakshi Stadium, Srinagar-ah 71st Bn Mullik Memorial All India Police Football C'hip final-ah Mizoram hian Assam Rifles chu 1-0 in an hneh.

Final-a goal awmchhun hi Lalbiakhlua (Biaktea) khung a ni a, Mizoram keeper F. Lalmuanawma chu best goalkeeper-a thlan a ni.

Coach Lalbiaksanga Colney hote hian Srinagar an pan hmain inbuatsaihna hun ṭha an nei a; champion tur hian Mizoram Police hian match sarih aṭangin goal 27 tehmeuh an khung a, goal li chauh an chhuah.

BS-a Colney chuan, "Kan thawhrim rah Pathianin mal a sawm a, Pathian vang liau liaua champion kan ni. Srinagar kan panna kawngah leiminin zan khuaa min dan ṭumte a awm a, inelna neih hnuah erawh kan tluang hle. Pathian malsawmna a ni," tiin Vanglaini a hrilh.

Mizoram Police FC chairman J Lalṭhafamkima, MPS chuan, "Mizoram Police tan mai ni lo Mizoram football tan hmasawnna ropui a ni a, an chhuah dawna ṭawngṭainaa kan hlan angin kan champion hi Pathian ropuina atan kan hlan," a ti.

Mizoram Police hi All India Police Football Championship-ah hian kum 1974 aṭangin an tel ṭan a, tun inelna hma hian final pawh an la thleng lo. Coach BS-a Colney hoin mellung thar an phun a, nomawi hial an chawi.

Police hi Mizoram football hmasawnna kawngah an pawimawh a, tualchhung football tinungtu an nih bakah Mizoram team-a player ṭha thawhtu an ni. Mizoram football tana an hnathawh hi a ropui hle.

Chutihrualin Mizoram Police hian Mizoram chhunga football inelna sang ber Mizoram Premier League nomawi an la chawi lo a, an hmabak chu MPL nomawi chawi a ni ta.