Alcaraz tan nomawi leh number 1

Carlos Alcaraz chuan Daniil Medvedev hnehin Indian Wells nomawi a chawi a, tun kara world ranking chhuak tharah chuan Novak Djokovic nek chhuakin a chung ber dinhnmun a luah bawk ang.

Spanish rawlthar Alcaraz hian Medvedev hneh turin darkar khat leh minute 11 bak a mamawh lo. Pathianni zan khan Russian tlangval lakah hian 6-3, 6-2 in hnehna a chang a ni.

Kum 19 mi Alcaraz chuan, "Ka tan chuan nomawi bakah number 1 dinhmuh luah leh theih chu duhthusam a ni a, ka tan chuan Indian Wells hi tournament duhthusam a ni," tiin a sawi a, a khelh danah a lungawi hle.

US Open champion a nih hnuah Alcaraz hi a hliam a, thla li chhung a inkhel thei lo. A inkhelh loh chhungin Djokovic chuan number 1 dinhmun a lo luah a, record hial a lo siam hman.

Mahse, Alcaraz a lo kir a, player ṭha leh danglam bik a nihna lantir chungin Djokovic a rawn nek chhuak lehnghal. Serbian star Novak tan chuan ani hi record a siam zelna tur kawnga mi hnawksak a ni thei ang.

Tun dinhmunah Djokovic hian Covid-19 vaccine a la duh lo, hei vang hian United States-ah a la zin thei lo. Indian Wells bakah hian tun kara khelh tur Miami Open pawh a khel thei dawn lo.