Man United-in Fulham ‘thinur’ vanneihpui

Pathianni zan khan Fulham-in Old Trafford an tlawh a, Manchester United lakah hun rei zawk inkhel thunun mah se minute hnih khat chhung lek an insum zawh loh avangin Wembley Stadium an thleng zo ta lo.

Cottagers hian Man United lakah Aleksandar Mitrovic hmangin hma an hruai a, amaherawhchu minute 72-naah coach Marco Silva bakah Mitrovic leh Willian te hnawhchhuah an ni. Player pakuaa khel Fulham lakah Bruno Fernandes-a'n penalty aṭanga siphurh sutin Marcel Sabitzer-a'n hmahruaina goal a khung a, injury time-ah Fernandes hian chak nemnghehna goal khungin Erik Ten Hag-a hoten 3-1 in hnehna an chang.

Fulham an thiam

Kar khat liam ta khan Arsenal-in Fulham hi 3-0 in an sawp a, Cottagers inkhelh hnuhnun ber dah ṭhat bakah league-a an dinhmun thlir kana Old Trafford-a an khelh dan chauh thlir chuan Marco Silva hote an thiam hle.

Fulham-in bul an ṭan ṭha a ni ringawt lo a, goal hmaah pawh an hlauhawm. Captain Harry Maguire awmna United tlarhnung an buai hle. Lisandro Martinez-a'n box chhungah Mitrovic a titlu a, referee-in penalty-ah a ngai lo. Second half-ah pawh United an insiamṭha lo a, David de Gea-a'n Antonee Robinson leh Willian te goal khung tur ṭha takin a dang.

Minute 50-naah Fulham-in an phu angin goal an khung a, corner aṭanga ball kal chu Mitrovic-a'n chiang takin a khung. Goal luh hnuah pawh Fulham thoin chance an ngah a, De Gea-a'n Mitrovic-a ball tauh ṭha takin a dang.

Thinur rah a kha

Fulham-in chak beiseina an nei lian chho a, Cottagers ṭantute thawm pawh a ring. Mahse, minute 70-naah thil danglam a thleng. Counter attack hmangin United-in an chhu let a, Antony ball pass ṭha chu Jadon Sancho-a'n lalutin keeper Bernd Leno a paltlang hnuah pet nghal mai loin Harrison Read a bum hnuah goal-ah petin Willian-a'n a dang.

Corner kick tura ngaih ni mah se VAR hmanga ennawn a nih hnuah Brazilian midfielder hian a kutin a dang. Referee Chris Kavanagh-a'n mual sira inhrosa Fulham manager Silva chu a hnawt chhuak phawt a, kut hmanga goal theihna dangtu Willian chu dan angin red card a pe leh bawk.

Mitrovic a insum zo lo a, thinrim taka referee a nam avangin Serbian striker pawh hi hnawhchhuah a ni. Man United captain Fernandes-a'n minute 75-naah chiang zetin siphurh sutna goal penalty aṭangin a khung a, minute hnih hnuah Sabitzer-a'n Luke Shaw cross chu mawi zetin a khung leh bawk.

Fulham-in an thinur rah an seng a, player pakuaa an khelh avangin Man United-in nuam sa takin hun tawp lam an hmang thei. Injury time-ah Fred-a ball pek chu Fernandes-a'n khung lehin mualneitu hi 3-1 in an chak.

Engtin zel?

Fulham player-te an chesual miau a, thinur vanga an mit tih dela a awm avangin referee Chris Kavanagh tan Mitrovic hnawhchhuah mai loh chu tihtheih a awm lo a, goal tur dangtu Willian pawh dan ang thlapa hnawhchhuah a ni.

Premier League-a Blackburn champion puitu Chris Sutton chuan, "Chhuanlam a awm thei lo. Official te chungah kut thawh a thiang lo. Naupang pawhin an hmu ang a, Mitrovic-a'n kut a thawh chuan tihve theihah an ngai palh ang. Chuvangin match 10 tal an hrem tur a ni," tiin a sawi.

Kum 1998 khan Paolo Di Canio chuan referee Paul Alcock a nam tluk avangin match 11 an hrem. Hemi chungchang hi sawiin Silva chuan, "Mitro khan referee a nam a, a inthunun thei tur a ni. Chutihrualin thutlukna siam turten thil thlen dan boruak kha an hriat tel a ṭul," tiin a player-in hremna na tak a phu loh thu a sawi a, tun chauh ni loin tun season-ah referee Chris Kavanagh thutluknaa an vanduai ṭhin thu a sawi tel bawk.

Manchester United manager Erik ten Hag chuan inkhelh banah penalty leh red card thutlukna a dik thu a sawi a, referee-ten mawhphurhnna an lak theih a ṭul ang bawkin manager-te pawh midang entawn tura an chet a ṭul thu a sawi. Dutch manager hian kar liam ta khan Southampton laka point hnih an hloh ṭumin Casemiro red card vangin referee na takin a sawisel a, tun ṭumah erawh referee thutlukna an ṭangkaipui tawh thung.