Cindy telna India an chak

South Asian Football Federation U-17 Women's Championship chu nimin khan khelh ṭan a ni a, match hmasa berah India chuan Nepal Under 17 chu 4-1 in an sawp nghal.

India tan Shilji Shaji chuan goal thum khungin hattrick a siam a, Pooja chuan goal khat khung ve bawkin, Nepal tana Barsha Oli goal khung chu mualpho zualpui khuhna chauh a ni.

Dhaka, Bangladesh-a neih inelnaah hian SAFF hnuaia ram India bakah Bangladesh, Bhutan leh Nepal te an tel a, Russia chu sawm bik an nih angin an tel bawk - team panga hi group khatah awm vekin, an inkhelh kual hnua point hmu sang ber chu an champion ang.

India U17 team-ah hian Cindy Remruatpuii Colney chu squad-ah a awm a, Armed Veng tleirawl hi bench aṭanga lutin India tana a match hmasa ber a khel.

Cindy pa Lalbiaksanga Colney chuan coach ni chungin All India Police Football Championship-ah Mizoram Police chu nimin khan a champion pui bawk a, an pafa tan nimin kha ni chhinchhiahtlak bik a ni.

India hian March 24-ah match an nei leh dawn a, zan dar 6:45-ah inelna thlengtu Bangladesh nen an inkhel ang - inkhel hi Sportzworkz YouTube channel chuan live-in a pe chhuak ṭhin a ni.