Pep-a'n FA Cup final luh a tum

Manchester City manager Pep Guardiola chuan FA Cup semifinal-a an record duhawm lo chu thaireh an tum thu a sawi a, English football-a club inelna ngaihhlut hlawhah final luh ngei a tum.

FA Cup semifinal-a inhmachhawn tur chu Pathianni zana quarterfinal khelh zawh a nih hnuah draw neih nghal a ni a, City hian Sheffield United hmachhawnin, Manchester United chuan Brighton & Hove Albion an hmachhawn dawn thung - final-ah Manchester derby hmuhna chance a awm, tihna a ni.

Pep chuan, "Kan game khelhchhiat ber chu Wembley Stadium-a FA Cup semifinal hi a ni ziah a, kan khelh apiangin kan khel chhia a ni ber - kan champion ṭum pawh khan semifinal chu kan khel chhe tho a ni," a ti.

Spanish manager hian Etihad Stadium-ah season sarih hun hmang tawhin, vawi ruk chu FA Cup semifinal-ah City a hruai thleng ta a, mahse, vawi khat chiah nomawi an chawi - kum 2019 khan semi final-ah Brighton chu 1-0 in an hneh hrem a, final-ah erawh 6-0 in Watford an sawp thung.

Pep chuan, "FA Cup semifinal kan luh ṭuma thil thleng chu thui taka ziakin ka pe thei ang che u," a ti - season hmasa khan City hian semifinal-ah Liverpool chu 3-2 in an ngam lo a, first half-ah 3-0 a ni hman hial.

City hian FA Cup semifinal-ah Arsenal chu vawi hnih an ngam lo tawh a, Chelsea lakah vawi khat an tlawm bawk. Guardiola chuan sawi zawmin, "Kan khel ṭha tawk ṭhin lo a, kan ti vel mai mai a ni. Liverpool pawh team ṭha tak an ni tih ka hria a, mahse, chawlhlawk hmaa 3-0 kha chu a mah mah deuh a ni.

"Mikel-a'n Arsenal a enkawl hmasak bera kan ngam lohte khan kan khel chhe takzet. Engtikah emaw chuan Wembley-a kal loin Manchester-ah semifinal kan khelh theih la beisei ila..." tiin a sawi bawk.

FA Cup semifinal hi April 22 leh 23-ah khelh a ni dawn a, City hian Bayern Munich nen Champions League quarterfinal second leg an khelh zawhah an khel dawn.

Pep chuan, "Tun ṭum chu kan nihna ang taka kan khelhchhuah theih ka beisei. Final luh hrim hrim lam a ni lo - kan khelh danah hian champion kan châk tawk loa hriatna hi ka nei ṭhin a ni," a ti a, a naute a fuih lawk nasa hle.

City-in semifinal-a an hmachhawn tur Sheffield United hi Championship club niin, kum 2014 hnua FA Cup semifinal an khelh hmasak ber tur a ni. FA Cup-ah loan player-ten an club nghet an tum theih loh avangin City aṭanga Sheffield-a loan-a khel Tommy Doyle leh Jamie McAtee te chuan City hi an hmachhawn thei dawn lo.

Pep-a team te aiin vawi 12 champion tawh Manchester United hmabak a hautak zawkah ngaih a ni a, Erik ten Hag-a team hian kum 2019-a semifinal khel thei Brighton lakah awlsam taka chak an beisei lo ang. United hian Europa League quarterfinal second leg-a Sevilla an hmachhawn zawhah FA Cup semifinal hi an khel dawn a ni.

FA Cup Semifinal
April 22-23, 2023

Manchester City Vs Sheffield United

Brighton & Hove Vs Manchester United