Hlauh nei lo Arsenal an sang fal ta!

Arsenal chuan Crtystal Palace 4-1 a hnehin Premier League hmahruaitu an nihna an sawhnghet. Gunners hian khelh hmabak 10 chauh an nei tawh a, pahnihna Manchester City aiin point riatin an sang fal tawh a ni.

Palace lakah goal hnih a khung baka assist neitu Bukayo Saka chuan eng team pawh hlauh a nei lo tih a sawi a, manager Mikel Arteta chuan international break an hman zawh hnuah pawh tuna an khelh ang chuan khel zel se a duh.

Changtupa Saka

Hale End chhuak a ni a, player dang aiin thil tih inangah Bukayo Saka hi Arsenal fans thinlungah a tla na bik. England international forward hian Gabriel Martinelli goal khung tur a siamsak phawt.

A hnu lam erawh Saka khung hun a ni, defender Ben White-a'n defender kara a ball lirh luhsak chu Saka hian angle zim tak aṭangin a khung a, substitute Kiernan Tierney cross chu chiang zetin a pet lut bawk.

Saka goal khung karlakah hian Granit Xhaka-a'n goal a khung, team goal ṭha bik a ni a, a siamsaktu Leandro Trossard leh a hmawr bawktu Xhaka ke kha Gunners tan a mawi zual ang.

Emirates Stadium an tlawh hma niin Crystal Palace hian Patrick Vieira an ban, kumina chak ni hmel an la hmuh loh vangin danglamna an beisei a ni, coach lailawk Patrick McCarthy hoin counter attack hman an tum viau.

Wilfred Zaha leh Odsonne Edouard ten Arsenal keeper Aaron Ramsdale tan hna hautak chu an siam ngei mai, mahse English keeper a che buai duh bik lo, corner aṭanga Jeffrey Schlupp khung chuan Palace boruak a chhem nung zo lo.

Champion beiseina

Arsenal hian kum 2003-2004 hnu lamah Premier League nomawi an la chawi leh lo, an champion hnuhnung bera nau piangte pawhin tunah chuan college an kal ṭan tawh, a rei ta vang vang hle - kum 19 zet a liam tawh.

Mikel Arteta hoin beiseina an nei sang mek - Europa League leh inelna dang pawh an ngai pawimawh zo lo, squad an neih chhah tawk loh vang a ni bawk. Europa League aṭanga an tlak hnua an result hi lawmna tur a ni ang.

Gunners manager Arteta chuan, "Premier League match rukah a zawnin hnehna kan chang ta a ni a, kan result chauh ni loin kan khelh chhuah danah lung a awiin a hlimawm thei takzet.

"International match khel turin player an feh chhuak sang sang dawn, an lo kir leh hunah pawh tuna an rilru puthmang ang tho hi rawn pu chhunzawm se ka duh. Leeds United kan khelh tur ngaihtuah a ngai," a ti.

Arsenal hi kar laihawla Sporting Lisbon nen match hautak khel chau an ni a, hun rei lote chhunga phur tak maia an khel leh nghal thei chu coach Arteta pawhin mak a ti a, a naute chungah a lawm hle.

Hmabak match 10 chu

Arsenal hian Premier League bak tun season chhungin khelh tur an nei tawh lo, season tawp hmain match khelh tur 10 chauh an nei tawh tihna a ni a, chung zinga match a zatve chu Emirates Stadium-a khelh tur a ni.

Arsenal hian international break zawh hunah Leeds United an mikhual dawn, an elpui ber Manchester City chu Liverpool hmachhawn turin Anfield lamah an lenglut dawn thung.

Reds hi Champions League beiseia thapui thawh lai an ni, an inkhelhna tur hi Anfield a nih bawk avangin Citizens tan fimkhur a ngai dawn - a lan dan mai chuan Gunners tan hmahruai belhchhah theihna remchang a ni mai thei.

Arteta naute hi hna hautak hmabak lo an ni bik lo. Emirates Stadium ngei maia an ngam lo Man City hi Etihad Stadium-ah an la lenchilh dawn, chumi dawtah Chelsea an mikhual zui ang - hna a awlsam dawn bik lo.

Premier League team zingah Arsenal player hi chawhrualin an kum a naupang ber, coach naupang takin a kaihhruai an ni bawk. Inelna boruakin a vawr tawp a thleng chho dawn a, an nihna tak chu April thla chhungin a hriat ang.

Arsenal hmabak a awlsam lo, chutih rualin an elpui ber Pep Guardiola naute hian an ngaihpawimawh ber Champions League an la khel dawn, team ṭha Bayern Munich nen an inkhel hah dawn.

UCL chauh a ni lo - FA Cup semifinal khelh tur an la nei bawk. Man City hi an squad a chah, chutih rualin UCL leh FA Cup-ah final an thleng a nih chuan Arsenal umphak bawk a harsa ve mai thei bawk.

A tawi zawnga sawi chuan Premier League nomawi chungchang chu Arsenal kutah a awm, an lak theih leh theih loh chu an mawhphurhna a ni, team dang hian dinhmun inthlak theih ni se chuan Gunners awmna a awm an duh vek ang.