El Clasico - Barca an chak; Real beiseina a tawp?

Pathianni zan El Clasico inkhel hmuhnawmah Barcelona chuan 2-1 in an elpui Real Madrid an hneh a, La Liga nomawi chawi turin an dinhmun an sawhnghet ta hle. Real erawh an tlawm avangin La Liga nomawi beiseina a thamral ṭan tiin a sawi theih a, Catalan club nena an inkarah hian point 12 lai a awm tawh - match 26 ve ve an khel tawh bawk.

Pathianni zana team pahnih intawn hmain Barcelona striker chhuanvawr Robert Lewandowski leh Real Madrid legend Karim Benzema hming ri ring mah se a tawpa chakna goal khungtu chu La Liga-a a vawi khat nana goal khungtu Franck Kessie a ni.

Real tan Barcelona defender Ronald Araujo chuan minute kuanaah own goal khungin, goal hmahruai a khungsak a, mahse, Sergi Roberto leh Kessie ten Barca tana rawn chhangletin mualneitu an chak.

Tun season-ah El Clasico hi vawi li khelh tawh niin, Real hi vawi khat chiah an la chak a, Barca hi vawi thum an chak tawh thung - April 5 zanah Copa del Rey semifinal second leg khelin team pahnih hi an intawng leh dawn a, first leg-ah 1-0 in Barca an chak tawh.

Chak tum ve ve

Real hi Champions League last 16 second leg-a 1-0 a Liverpool hneh hlim an ni a, inkhel pahnih belhkhawmah 6-2 a hnehna changin quarterfinal an lut - Carlo Ancelotti naute an inrintawk vanglai tak a ni.

Hetihlai hian Barca erawh European football-ah beisei tur an neih tawh loh avangin kar khat chawlh hahdamna hun an nei a, Real hmachhawn turin duhthala inbuatsaihna hun ṭha an nei thei.

A tawi zawnga sawi chuan team pahnih an inbuatsaih ṭha tawk a, chak an tum ve ve - Barca-in an chak chuan nomawi chawi turin an dinhmun a ṭha sawt dawn tih an hrechiang a, Real-in an beiseina chhi nung turin chak an mamawh tih an

hre thung.

Real hian inkhel hamrik a rik rual deuhthawin chance duhawm an nei nghal a, mahse, Karim Benzema-a'n penalty box pawn aṭanga a shot chu Barca keeper Marc-André ter Stegen chuan harsatna nei loin a lo dansak.

A hmuhnawm zel

Benzema-a'n an inrin hmain Barca a enchhin nghal a, Catalan club an insum bik lo. Minute thumna lekah Lewandowski chuan yard 25 vela hla aṭangin ṭha zetin shot a nei a, mahse, Real keeper Thibaut Courtois ṭhat tawkzia pholanna remchang mai a ni.

Barca an insum lo. Raphinha chuan Sergio Busquets-a ball cross duhthusam chu ṭha zetin a tauh a, mahse, Courtois tho a la din avangin Belgian keeper hian world class keeper a ni, tih pholanna remchang atan a hmang.

Courtois-a dan per aṭanga ball kal zel chu Sergi Roberto ke bulah tla mah se, bar chungah a thlawh a, Barca an vannei tawk lo. Inkhel ṭantir aṭangin chance a awm nghal mawlh mawlh a, minute kuana a thlen meuh chuan goal a lut ta nge nge.

Vinicius Jr ball cross satliah tak anga lang chu Barcelona defender Ronald Araujo chuan lo tauh chhuah tum mah se, an goal venhim a tumna lamah an lamah a tauh lut a, mikhual team Real-in 1-0 in hma an hruai.

Keipui thinrim

Barca-in an rin aia hmain goal an chhuah a, na takin Real nawr zui mah se centre back Andreas Christensen leh Raphinha ten an chance neih an chhawr thei lo a, khel ṭha zawk Barca-in an vanduai zan an tawng dawn niin a lang hman.

Mahse, a lan ang ngawta thil ngaihtuah fuh lohzia a lang nawn - minute 45-naah Raphinha shot chu dan nawn ni mah se a per lehlam chu Roberto-a'n goal-ah a pet a, keeper che ṭha tak Courtois meuh pawhin a dang tawh bik lo; 1-1 a ni.

Barca an inthlahdah duh lo. Point thum hlawhchhuah ngei tumin Real an nawr chhunzawm a, Lewandowski-a'n mawi zeta a inher rem hnua a shot chu an lo khawih hman avangin a out a, minute 74-naa khel ṭha em em mai Raphinha-a shot pawh Courtois bawkin ṭha zetin a dansak.

Bench aṭanga luhtir Marco Asensio chuan minute 81-naah Real tan chakna goal a khungah inngai mah se video assistant referee rawn a nih hnuah pawmsak a ni lo a, hun pek belh minute hnihnaah Kessié chuan Barca tan chakna goal a khung zui - kum 19 mi left back Alejandro Balde siamsak a ni.