Red Bull car um phak an awm lo

Formula 1 season an ṭan chho mek a, team leh driver champion lai an che na hle - intlansiak vawi hnih neih tawh chinah chuan Red Bull car um phak an awm lo, midang chunga leng an ni.

Pathianni zana tlan zawh tak Saudi Arabian Grand Prix-ah pawh, a hmasa ber aṭanga tlan ṭan Sergio Perez chu pakhatna a ni a, amah ang bawka Red Bull car khalhtu Max Verstappen chu pahnihnaah a thleng.

Dutch tlangval Verstappen hian qualifier lamah harsatna a tawk, khawl lam chiang lo vangin a tlan ṭha lo. Intlansiak takah 15-na aṭangin a tlan ṭan, mahse lap khat tlan nana hun hmang rei lo ber dinhmun luah chungin pahnihna a ni thei hial.

Tun season intlansiak hmasaah khan Red Bull driver pahnih Verstappen leh Perez te hi a hmasa pahnihah an lo thleng tawh bawk. April 2, Pathianni zana tlan tur Australian Grand Prix atan pawh rinkai an ni leh nghal dawn.

F1 inelna huangah Perx hi vawi nga a chakna a ni ta chiah, kumin chu champion a tum ngam dawn niin a lang. Mexican driver chuan, "Champion nih ka duh, a bik takin rim taka kan thawk a nih chuan hlawhtlin châka tuihalna a nasa ṭhin," a ti.

Red Bull driver pahnih hnungah hian Fernando Alonso a thleng. Spanish driver hi second nga chhung atan hrem a ni chungin a tlan ṭha hle a, a tan chuan season bul a ṭan chhoh dan hi duhthusam a ni ngei ang.

Aston Martin car khalhtu Alonso hi rin hlawh lo tak chungin, intlansiak hmasa khan dawhsan (podium) lawn phak zingah a tel, tuna a lan dan chuan Red Bull team tibuai phak ber tur a ni rih.

Mercedes tan erawh hmasawn a la ngai nasa. George Russell chu palina a ni a, a hnung chiahah world champion vawi sarih ni tawh Lewis Hamilton a thleng thung, season hmasa lam ang bawkin Red Bull an phak lo.

Britain tlangval Hamilton chuan, "Formula 1 car ka hmuh tawhah chuan a la chak ber, kan tlan chak zawh poh leh keini aia chakin an tlan zel," tiin Red Bull car a fak, season hmasa pawh khan an elpui car an tluk lo tih a lo sawi tawh bawk.

Hamilton hian Michael Schumacher nena record inṭawm an neih, vawi sarih world champion nih chu kal fal san a duh - mahse Mercedes hian champion pui tham car an chhawp chhuahsak lo niin a hria.

Mercedes tan season khat daih chauh contract a nei tawh a, mimal record siam a duh a nih chuan a team awmna hi a chhuahsan hreh dawn lo niin a lang. Chutihrualin Red Bull el phak tur eng team nge a zawm ang, tih chu zawhna chhan harsa tak a ni ang.