Juve-in Napoli champion kawng an sialsak

Serie A-ah chhiarkawp danin champion tur la chiang lo mah se Napoli an champion dawn tih chu a chiang a, hun chauhin Luciano Spalletti hote nomawi chawi hun hi a dal tawh.

Pathianni zan khan Napoli hian Torino chu 4-0 in an sawp a, anmahni hnaihtu Inter Milan chu Juventus-in an hnehsak bawk. Gli Azzurri hi match 11 khelh tur la awm aṭangin 19 points-in an sang tawh a ni.

Osimhen Show

Napoli-in champion kawng an zawh theih nan player ṭha an mamawh a, Naples club hian tunlai striker chhuak thar ṭha ber zinga mi Victor Osimhen an kawl. Olimpico di Torino-ah Osimhen hian minute kuana lekah goal hmahruai a khung a, minute 51-naah Napoli goal thumna a khung leh bawk.

Nigerian striker Osimhen hian kar laihawla Eintracht Frankfurt an hneh ṭum khan goal hnih a khung tawh bawk a, match zawnin goal hnih a khung. Serie A bikah Osimhen hian match 23 khelin goal 21 a khung a, assist vawi li a nei tawh.

Europe club lian ṭhahnem takin Osimhen hi an enthla mek a, nipui bazarah Napoli tan pawh chelh a harsa ang. Nigerian striker hi 6ft 1in-a sang a ni a, a tlan chak bakah boruakah a ṭha tel bawk.

Engtin zel?

Napoli hian Khvicha Kvaratskhelia an kawl bawk a, kum 22 mi Georgian winger hian penalty aṭangin Torino lakah goal a khung ve bawk. Dinamo Batumi aṭanga euro maktaduai 10 vel leka Napoli zawmtu hian Europe club lian zawk a zawm a nih chuan a man hi a let nga aia tamin a pung chho ang.

Club legend Diego Maradona hming chawiin Kvaratskhelia hi 'Kvaradona' hminglem an pe hial a, hmabak a nei êng hle. Manager Luciano Spalletti erawhin pressure an neih loh nan player dang fak a thlang zawk.

Spalletti chuan, "Kvara leh Osimhen te chauh kan nei lo. Di Lorenzo hi player ṭha tak a ni. Kim Min-jae ang player hi ka hmu meuh lo, match tina khelh hi a phu," tiin a sawi a, South Korean defender Kim Min-jae hi kumin bika defender ṭha ber a nih thu a lo sawi tawh bawk.

Juve an chak

San Siro-ah Inter Milan-in Juve an ngam lo a, goal awmchhun hi minute 23-naa Filip Kostic khung a ni. Inter hi an chak loh avangin pathumnaah an tla thla a, Napoli hnaih bertu chu Lazio an ni ta. Lazio hian pahnihna dinhmun luah tur hian Jose Mourinho kaihhruai AS Roma chu 1-0 in an hneh a ni.

Juve erawh point 15 ngawt paihsak an nih avangin tun season-a an tih theih sang ber chu season thara Champions League khelh phak a ni. Tunah hian Turin club hian point 15 paihsak an ni chungin point 41 an hmu a, palinaa awm AC Milan chu point ruk chauhin an pha lo. Massimiliano Allegri hote tan UCL khelh theih a la beiseiawm hle.