Bayern an chak lo, Bundesliga a nung thar

Bundesliga-ah champion lai Bayern Munich-in Pathianni zan khan Bayer Leverkusen 2-1 in an hneh lo a, khelh zat inangah Borussia Dortmund chu table chung berah an awm. International break zawhah Bayern hian Allianz Arena-ah Dortmund an mikhual nghal dawn a, April 1, Inrinni zana inkhel tur hi Bundesliga final ang hiala chhal theih a ni ang.

BayArena-ah Bayern-in Joshua Kimmich hmangin first half-ah hma hruai mah se mualneituin second half-ah penalty ṭum hnih an hmu a, Exequiel Palacios-a'n a khung ve ve. Xabi Alonso-a'n a club hlui champion lai Bayern meuh a team nen an hneh avangin season thara Europe inelna tel pha turin beiseina a nung thar hle.

Bayern phawt

Bayer Leverkusen-in Bayern lakah team ṭha an ni tih an pholang a, inkhel bul an ṭan ṭha zawk. Inhliam vanga hun rei tak chawl Florian Wirtz-a'n tun season-ah a vawi nga nan bul a ṭan ve chauh a, chutihrualin German rawlthar hian Bayern lakah a theihna a pholang.

Germany tana koh thar Moussa Diaby a hmuhnawm a, Jeremie Frimpong pawhin Bayern keeper Yann Sommer tan hna a siamsak. Amaherawhchu Leverkusen-in chance ṭha an hlah laiin Bayern erawhin goal zawna an pet hmasa ber an khung thung a, minute 22-naah Leon Goretzka pek chu Joshua Kimmich-a'n goal-ah a khung. Kimmich-a ball pet hi Leverkusen defender Edmond Tapsoba-a'n a dan per avangin keeper Lukas Hradecky tan dan ngaihna a awm lo.

First half-ah Bayern-in 1-0 in hma an hruai a, minute 45 chhung an inkhelh dan thlirin mikhual team hi an vanneiah a ngaih theih.

Penalty vawi 2

First half-ah Amine Adli a langsar lo a, second half-ah erawh kum 22 mi French winger hi a a langsar hle. Second half an ṭan chauh tihin Adli hi box chhungah a tlu a, referee-in a tlu derah ngaiin yellow card pe zet mah se mual sir monitor a en hnuah Benjamin Pavard-a'n a titlu tih a hmu a, penalty a pe ta zawk.

Minute 55-naah Argentine midfielder Exequiel Palacios a rawn pen chhuak a, Bayern keeper Sommer bumin chiang takin a pet goal. Bayern tlarhnung an chesual nawn a, Dayot Upamecano-a'n box chhungah chiah Adli hi a titlu a, VAR hmanga ennawn a nih hnuah referee-in penalty a pe.

Minute 73-naah Palacios bawk a rawn pen chhuak a, keeper dinglamah bawk petin Sommer-a'n ring dik tawh mah se a dang ta chuang lo. Goal hnih chhuah hnuah Bayern ben harhin an awm a; Serge Gnabry, Leroy Sane leh Alphonso Davies ten chance nei bawk mah se Finland keeper Lukas Hradecky an paltlang thei lo.

Bayern-in Leverkusen laka point an hlawhchhuah loh avangin international break laiin pahnihnaah an awm a ṭul dawn a, Bundesliga ṭan leh hunah Dortmund an hmachhawn nghal dawn avangin Nagelsmann leh a hote Der Klassiker atan an inbuatsaih ṭan a ṭul ang.