An mualah PSG an tlawm

Paris St-Germain-in April 2021 hnua a vawi khat nan an mual Parc des Princes-ah hneh loh an tawng. Pathianni zan khan Rennes chuan French champion PSG hi 2-0 in an hneh a, Karl Toko Ekambi leh Arnaud Kalimuendo ten goal an khung.

PSG-in Lionel Messi an lak hnua an muala league-a an chak loh vawi khatna a ni.

PSG hian match 35 chhung tlawm an neih loh hnuah hneh loh an tawng a, hwti chung hian Christophe Galtier hote hian match 28 aṭanga point 66 an hmuh tawh avangin kum 13 chhunga a vawi 11 nan an champion ngei dawn niin a lang.

Lionel Messi leh Kylian Mbappe te an khel tluan a, Neymar erawh inhliam vangin a la tel lo. PSG hian Champions League-ah Bayern Munich an hneh lo a, Messi an lak hnuah Europe inelna sang berah ṭum hnih ngawt last 16-ah an tla.

Rennes an hneh loh ṭum hian PSG player dang zawngin anmahni ṭantute ṭha taka an chhawn laiin Messi erawhin dressing room a pan nghal a, Argentina captain hi season tawpa a contract a tawp dawn a, châm zui tak maw?

France rama chan-chinbu lian L'Equipe chuan PSG-in kalphung thlak an tum tih a tarlang a, Messi a chhuak ta a nih pawhin thilmak a ni lo ang. Chutih rualin PSG-in Messi hi contract an zawrh a, Argentine forward hian French champion hmalak tum dan a hre duh hmasa niin sawi a ni thung.

Messi awm hma ang thoin PSG hian Ligue 1 an thunun a, chutihrualin UCL-a beisei an phak loh avangin Argentina captain bakah Neymar leh manager Christophe Galtier thlengin an hmalam hun a chiang lo.