Australia-in India an sawp

Pathianni khan Australia chuan Dr. Y.S.Rajashekar Reddy Cricket Stadium, Visakhapatnam-ah India chu wicket 10 ngawtin an sawp. Men in Blue leh Aussies te hi ODI match thum khelh turah vawi khat ve ve an chak a, March 22, Nilaini hian match tawpna ber an khel ang.

ODI match vawi hnihnaah hian Australia-in vawm hmasak an thlang a, an tifuh. Shubman Gill, Suryakumar Yadav, Mohammed Shami leh Mohammed Siraj te run siam loin pavillion-ah an kir a, run siam tam deuh Virat Kohli pawhin 31 runs chauh a siam.

India hian over 26-ah 117 chauh siamin an thi fai vek a, Australia tan hna harsa tur a awm tawh lo. Aussies opener Travis Head (51) leh Mitchell Marsh (66) ten half century an siam ve ve a, over 11 lekah 121 runs siamin hnehna an chang.