Chelsea hnartu Willian?

Willian hma lam hun a chiang lo a, nipui bazarah a thlawnin a duh lam a hawi thei dawn. Brazil international hi a khelh mekna Chelsea chuan contract thar zawrh mah se an inrem thei rih lo, an hmelma Arsenal lam a hawi nia sawi a ni.

Kum 31 mi Willian hian June thla tawp thleng bak kha Blues tan contract a nei lo. Covid-19 vangin season zawh hun a tlai a, inrem lailawkna neiin Champions League an khelh zawh hma chuan London club hi a chhuahsan dawn lo.

Frank Lampard-a'n a winger hi chelh a duh; mahse August 9, Pathiannia kum 32 tling mai tawh tur hi season hnih daih bak contract an zawrh ngam lo. Khawthlang media-ten an tarlan dan chuan Gunners lamin season thum daih contract an zawrh ngam thung, thutlukna a la siam fel lo.

Willian-a agent Kia Joorabchian chuan a player hi a la 'luck' reng thu a sawi. Tunah hian Premier League club pahnih, European club lian pahnih bakah Major League Soccer aṭanga rimtu a neih thu a sawi.

Brazilian forward lakluh duhtu club hi sawi lan vek ni lo mah se Barcelona leh Inter Milan te pawh an tel nia sawi a ni. Amaherawhchu Willian hian kum sarih chhung a awm tawhna London khawpui chhuahsan ngai loa inkhelh theih a duh - North London club a pan a nih pawhin a mak lo ang.

Arsenal hian tun hmain goalkeeper Petr Cech leh defender David Luiz te chu Blues aṭangin an lo lalut tawh a, an striker Olivier Giroud chu an elpui club lamah hian an hralh ve thung tawh. Blues manager Lampard chuan, "Willian nen hian kan inpawh ṭha hle a, mahse tuna a dinhmun tak hi chu ka hriatpui lo," a ti. Season liam ta league match 36 kheltu hi a hma lam hun tichiang thuai tura a duh thu a sawi bawk.

Chelsea hian Timo Werner leh Hakim Ziyech te an nei thar tawh, tunah hian Bayer Leverkusen aṭangin Kai Havertz lak an tum mek bawk; tlarhma lamah chuan player chhawr tur an ngah viau dawn niin a lang.Mahse, tlarhnung lam an thuam ṭha a nih loh chuan an buaina ngaiah an buai dawn. An hel lai Nathan Ake chu Manchester City nen an inrem tawh a, West Ham defensive midfielder Declan Rice leh Leicester City duhlai Ben Chilwell an thlithlai mek.

Defender Marcos Alonso, Emerson, Kurt Zouma, Andreas Christensen leh Antonio Rudiger te bakah midfielder Jorginho te chungah Lampard-a'n rinna a nghat ngam lo nia sawi a awm, ani hi sum tuak nan an hralh a nih pawhin a mak lo ang.