MSL Season 8 final khel tur Khatla TBL

Mizoram Super League season 8 final khel turin Khatla TBL an tling. MSL vawi hnih champion tawh hian Mission Veng Hotshots chu 84-76 a hnehin best of three series chu 2-0 in an la a, final an lut tlang a ni.

Champion lai Zarkawt BCA chu final khel tur hian an tling tawh bawk, team ṭha leh sulhnu nei ṭha pahnihin tualchhung basketball inelna sang bera nomawi an inchuh tur hi a hmuhnawm ang. March 24, Zirtawpni hian finals game 1 khelh a ni ang.

A tawpah TBL

Thawhṭanni zan R. Dengṭhuama Indoor Stadium, Mualpuia inkhelah Mission Veng Hotshots lamin bul an ṭan fuh zawk. Samuel Zodinpuia enkawl team tan hian Jacob Lalhmingsanga, B. Malsawmkima, Lalrozama, Samsam Lalchhuanawma leh Christopher Galbreath Jr ten bul an ṭan.

An chak loh chuan an zinkawng a tawp nghal dawn tih an hria, chak ngei tumin bul an ṭan. Quarter hmasa berah 30-14 zetin hma an hruai a, hma an hruai fal vanglai ber phei chuan point 18 teh meuhin an sang zawk.

Mahse, tawnhriat nei TBL lam zawimuangin an insiamṭha. Tlem tlemin an hnaih zel a, quarter thumna tawp thlengin Hotshots la chungnung mah se, quarter hnuhnung ber bikah Khatla team hian 22-11 in an hneh a, an pumpuiah an lehthal theih phah.

Khatla TBL tan game 1-a khel ṭha tak Vanlalṭhazuala chu a chau tih a lang a, point ruk bak a nei thei lo. India tana koh tawh Ṭhazuala chet fuh loh karah Eddie Zaithanmawia chuan point 20 a rawn nei a, an chak theihna hnar a ni.

Rilru puthmang

Chak lo mai thei dinhmuna an din hnuah Khatla TBL an tho chhuak a, manager H. Lalhruaitluanga chuan, "A bul ka ṭan laia kan rilru put hmang a inang lo a ni. Mission Veng Hotshots khan chak ngei ngei tumin a bul an ṭan.

"Keini erawh a tirah kan inthlah dul hret. Chutih rualin hun harsa tak aṭanga kan thawh chhuah leh dan khan min ti lawm hle. Film ang mai a ni a, a tawpah kan vannei, tun semifinal kan khelh dan chu final atana inbuatsaihna duhthusam a ni," tiin Vanglaini a hrilh.

TBL hian MSL season tir pahnihah nomawi an chawi, a hnuah Mission Veng Vikings an champion a, tun hnai season hnuhnung pali chu Zarkawt BCA kutah a lut vek - kumin hian Khatla team hian a vawi thum nan champion an tum dawn.

Vikings an champion ṭum khan tuna TBL manager Hruaia hi team enkawltu zinga mi a ni a, a hnu lamah Mizoram junior team hlawhtlinna chanpuiin, tualchhung school hrang hrang inelnaah a naute a champion pui tawh bawk, kuminah MSL title an beisei ngam ang.

Squad a pan

Mission Veng Hotshots tan Christopher Galbreath Jr (30 points) chu mimala thawhhlawk a ni, hnehna chanpui tur erawh chuan tualchhung player lamin an thlawp ṭhat a ngai ṭhin, an player pawimawh Lalrozama'n nidang a phak lo hret chu an tuar.

Hotshots coach Samuel Zodinpuia chuan, "Rozama kha a hliam a, lak chhuah zawk pawh a ngai. Mahse, aman a zuam angin a khel chhunzawm a, ni danga a game ang a phak ta lo kha a pawi, kan squad chhah tawk lo vang a ni.

"Inkhel boruak a sang a, anni lamin tawnhriat an nei ṭha si, ka naute zingah player naupang leh tawnhriat la ngah lo an tam zawk, a tawpah chuan kha kha kan tuar," tiin Vanglaini a hrilh a, an squad neih dan chhut erawh chuan an thlen chinah a lawm.

Samson Lalchhuanawma (17 points) leh Jacob Lalhmingsanga (11) te an khel ṭha viau a, mahse Rozama (14) bak chu point thum nei tling thei player dang an nei lo, coach Samuel-a sawi angin an squad chhah tawk lo an tuar.