A sang zual 10 zingah Nadal a tel lo

Mipa tennis thuneitu sang ber Association of Tennis Professionals (ATP) chuan Thawhṭanni zan khan world ranking thar a ti chhuak a, kum 18 chhunga a vawi khat nan Rafael Nadal chu ranking sang zual 10 zingah a tel lo!

Spanish star Nadal hian Australian Open nomawi a kawl lai a humhim thei lo a, season hmasa lama pahnihna a nihna Indian Wells aṭanga point 600 a neihsa a hloh bawk - player pali ngawtin rawn kal khumin 13-naah a awm.

Grand Slam vawi 22 champion tawh Nadal hi hliam vangin a chawl mek - Australian Open hnuah a la inkhel leh lo. Kum 2005 April 10 aṭang khan a sang zual 10 zingah hian a tel ngar ngar a, a record duhawm tak hi a hum thei ta bik lo a ni.

Nadal ranking a tlak hniam lai hian, amah ang bawka Spanish player Carlos Alcaraz chu a chung berah a awm thung. Indian Wells champion hian Novak Djokovic khumin pakhatna dinhmun a luah.

Alcaraz inhliam karah Novak Djokovic-a'n number 1 dinhmun a luah hman a, world number 1 ni rei ber record pawh a siam hial. Mahse, Serbian star hian a dinhmun a humhim reng thei bik lo.

Covid-19 vaccine a lak duh loh avangin harsatna a la tawk zel. United States-ah a zin lut thei lo a, hei vang hian Indian Wells a khel lo a, inelna dang Miami Open pawh a khel thei dawn lo - atan ranking siamṭhat a theih loh a ni.

A zawna match 19 a chak hnuah Daniil Medvedev-a'n Alcaraz a ngam lo a, tournament a khelh hnuhnung berah nomawi chawi ta chiah lo mah se player pakhat kal kanin panganaah a awm.

Indian Wells quarterfinal-ah Alcaraz hneh lotu Felix Auger-Aliassime chu world number 6 a ni thar - Canadian tlangval hian tennis a khelh hun chhunga a ranking san ber ṭum a tawng a ni.

Season hmasa Indian Wells champion Taylor Fritz chuan a thlen san loh a tuar, a ranking point a hum theih loh avangin 10-naah a tla hniam duai, player panga zetin an kal kan - Jannik Sinner chu a dawt chiahah awmin, Hubert Hurkacz chu pakuana a ni thung.