Lianzuala telna India vawiinah inlan dawn

International break a ni a, India pawhin match nei loa khawhral a tum bik lo - zanin dar 6:00 hian Myanmar nen Hero-Tri nation football tournament-a an match hmasa ber an khel dawn a, ISL Player of the League dawngtu Lallianzuala Chhangte chu bul ṭan tura beisei a ni.

Khuman Lampak Stadium, Imphal, Manipur chuan inelna hi a thleng a, Star Sports chuan live-a en theih turin a pe chhuak dawn a, online-a en duh tan Disney+Hotstar-ah a en theih bawk ang - inelna thlengtu India tan chak loh a mawi lo ang.

An inpeih tawh

India squad-ah Lallianzuala Chhangte chu Mizo player awmchhun a ni a, Mumbai City tana a khelhpui Lalengmawia Ralte-in season ṭha tak hmang mah se season tawp lamah a inhliam avangin squad-ah telh a ni lo.

Lianzuala hian tun season inelna hrang hrangah goal 17 ngawt khungin, assist vawi kua a nei a, Sunil Chhetri tih loha Indian player zinga ISL Golden Ball dawng thei hmasa ber a ni bawk - zaninah pawh bul ṭan tura beisei a ni.

Lunglei tlangval chuan, "Duh angin inbuatsaihna hun a tam tawk lo a, mahse, fit sa vek kan nih avangin kan phur khawp mai," tiin Vanglaini a hrilh a, team boruak a ṭha.

India an ṭha?

Blue Tigers hi ISL season hmang zo hlim an ni bawk a, player-te boruak a ṭha rih. India coach Igor Stimac-a'n 4-4-2 formation a hmang tlangpui a, a ṭul dan a zirin 4-2-3-1 ah a her rem leh ṭhin a, a player rem dan tur hi hriat a châkawm tawh hle.

Kum 38 mi Sunil Chhetri hi India tan innghahna la ni reng mah se a kum a tam ve hret tawh a, ISL final a khelh chauh bawk avangin bul a ṭan a rinawm lo a, chuti a nih chuan Stimac-a'n 4-2-3-1 hmangin tlarhmaah Mohun Bagan striker Manvir Singh chu mal tlat tura ngaih a ni.

Manvir-a hnung chiahah Brandon Fernandes dingin, Lza leh Jamshedpur winger Ritwik Das emaw Mumbai winger Biping Singh ten an thlawp thei ang a, midfield-ah Chennaiyin captain Anirudh Thapa leh Manipur tlangval Jeakson Singh te an ding dun thei ang.

A hnung lam

Gurpreet Singh Sandhu-a'n ISL final khel chau mah se Stimac-a'n khaw dang hawi ai chuan Punjabi keeper pasang hi rin nawn a thlang ngeiin a rinawm a, a hmaah FC Goa centre back Anwar Ali leh Mumbai defender Mehtab Singh an inkawp ang a, mual sir lamah Mumbai right back Rahul Bheke leh Hyderabad left back ṭha mi Akash Mishra ten an venpui thei ang.

Hetia thlir mai chuan India squad hi an ṭha tawk a, chutihrual chuan Myanmar lakah induh thei lutuk an awm lo - vawi li an intawn tawhah India hi vawi hnih chiah an la chak a, vawi khat inhnehtawkin, vawi khat an tlawm a, Blue Tigers hian an chakna inkhelah 1-0 ve ve bakin hnehna an chang lo.

Lianzuala chuan, "Kan intawn tawhna thlirletin Myanmar hi zuam ngawt chi an ni lo a, hnehna kan chan theih nan ṭan viau a ngai ang," a ti a, Mizo mipui ṭawngṭaipuina a ngen bawk.

Myanmar hi

Blue Tigers tan Aung Thu chu ven uluk ngai tur a ni a, kum 26 mi attacking midfielder hi Thai League 1 club Lamphun Warriors tan a khel mek - Myanmar Player of the Year-ah ṭum li ngawt thlan a lo ni tawh.

Kum 21 mi winger Hein Htet Aung hi Malaysian club ṭha Selangor tana khel lai niin, Thai club ṭha Ratchaburi full back Hein Phyo Win pawh ngaihthah a thiang lo. Lianzuala leh Shan United left back Nanda Kyaw inhmachhawn tur hi hmuh châkawm zinga mi a ni. Kyaw hi kum 26 chauh ni mah se ram tan match 39 a khel tawh a, player rorum, thawkrim leh taima a nihna hi a larpui a ni.

Myanmar coach hi Michael Feichtenbeiner niin, German coach hian an ram club tenau a enkawl nual tawh a, Germany Under 15 leh Under 17 a lo enkawl tawh bawk - India ram leilung ngeia Blue Tigers hneh hi a châk ang.