ISL team of the season-ah Lianzuala & Apuia

Indian Super League chuan ISL khelh zawh taka team of the season an puang a, Mizo player zingah Lallianzuala Chhangte leh Lalengmawia Ralte (Apuia) an tel - player pahnih hi Mumbai City tana khel ve ve an ni.

Mumbai hian Lianzuala leh Apuia bakah hian attacking midfielder Greg Stewart leh right back Rahul Bheke chu an thawh bawk a, ISL champion ATK Mohun Bagan chuan keeper Vishal Kaith leh centre back Pritam Kotal an thawh ve bawk - Kotal hi captain-ah thlan a ni.

Hyderabad FC aṭangin centre back Odei Onaindia leh full back Akash Mishra an lang a, Bengaluru-in midfielder Suresh Wangjam thawhin, FC Goa forward Noah Sadaoui leh Odisha FC forward Diego Mauricio an lang bawk.

A hming Lianzuala

Lianzuala tan tun season ISL hi season duhawm bik a ni - league match 22-ah goal 10 khungin, assist vawi ruk a nei a, Hero of the League-ah thlan a ni. Sunil Chhetri tih lohah chuan Indian player zinga ISL Golden Ball dawng thei awmchhun a ni.

January khan Lianzuala hi hero of the month-ah thlan a ni a, hero of the match-ah vawi li thlan niin, East Bengal captain Cleiton Silva, Mumbai tana a khelhpui Greg Stewart leh Hyderabad forward Bartholomew Ogbeche te nen vawi li ṭheuh thlan an ni a, hero of the match nih hnem lamah ATK Mohun Bagan striker Dimitri Petratos (5) chiah a tluk lo.

Lianzuala hian goal a khung tam satliah lo - a goal khung 10 aṭanga goal ruk chu a team hnufual lai emaw khingpuite nena inhnehtawk lai emawa a khung a ni a, league round hmahruaitu an nih theih nan a thawhhlawk hle.

Apuia a thiam reng

ISL player man to ber Apuia'n season dang ang thoin a man phu tawkin a khel chhuak a, league match 17 khelin goal thum a khung a, a passing accuracy hi 84.82% niin, vawi 62 tackle a nei a, clearance vawi 14 neiin, block vawi 15 a nei.

Mahse, Vaivakawn tlangval hian season tawp lamah a ke rekah hliam a nei a, India squad-ah pawh a awm lo phah - heti chung hian ISL-in league match 17 a khelha a hnathawh an hmuh hmaih lo a, team of the season-ah an telh.

Apuia hi hero of the match-ah vawi khat thlan niin, December khan Emerging Player of the Month-ah thlan a ni bawk a, kum naupangtê ni chungin ISL-ah a tlangnel tawh hle - Mumbai coach Des Buckingham chu team of the season-ah hian coach atan thlan a ni.