Euro 2024 khel tur zawnna ṭan a ni dawn ta

Europe ram tana football inelna sang ber UEFA Euro 2024 khel tur zawnna chu March 23, Ningani aṭangin khelh ṭan a ni dawn. Germany-in Euro 2024 hi an thlen dawn avangin an tling sa a, hmun ruak 23 dang hi Europe ram 53 ten an inchuh ang.

Qualifier kalphung

Ram 53 chu group 10-ah ṭhendarh an ni a, group tin aṭangin a sang pahnih zel an tling nghal dawn. Qualifier aṭangin ram 20 an tling ang a, inelna thlengtu Germany nen ram 21 an ni chiah ang. Hmun ruak pathum dang chu playoff hmanga zawn tur a ni.

Group A-ah Spain, Scotland, Norway, Georgia leh Cyprus te an awm. Spain hi team langsar ni mah se Norway-ah Erling Haaland leh Martin Odegaard te an awm tih hriat a ṭha. Georgia-ah pawh Napoli star Khvicha Kvaratskhelia a awm bawk.

Group B-ah Netherlands, France, Republic of Ireland, Greece leh Gibraltar te an awm a, group C-ah Italy, England, Ukraine, North Macedonia leh Malta te an awm bawk.

Group D-ah Croatia, Wales, Armenia, Turkey leh Latvia te an awm a, Gareth Bale tel lohna Wales fiahin an awm dawn. Group E-ah Poland, Czech Republic, Albania, Faroe Islands leh Moldova te an awm a, Robert Lewandowski telna Poland tan hna harsa tur awmin a lang lo.

Group F-ah Belgium, Austria, Sweden, Azerbaijan leh Estonia te an awm a, coach thar Domenico Tedesco hnuaiah Belgium-in bul a ṭan ang. Group G-ah Hungary, Serbia, Montenegro, Bulgaria leh Lithuania te an awm a, group H-ah Denmark, Finland, Slovenia, Kazakhstan, Northern Ireland leh San Marino te an awm a, group I-ah Switzerland, Israel, Romania, Kosovo, Belarus leh Andorra te an awm bawk.

Group J-ah Portugal, Bosnia & Herzegovina, Iceland, Luxembourg, Slovakia leh Liechtenstein te an awm a, Cristiano Ronaldo a la inlan dawn avangin he group hian ngaihven a hlawh ang.

Playoff chu

Ram pathum dang hi playoff hmangin an zawng dawn a, hei erawh tun ṭuma khelh tur qualifier nen inzawmna a nei lo. Nations League (2022-23)-a team chet ṭhat dan aṭanga zawn tur a ni thung.

Nations League-ah Europe ramte chu League pali League A, B, C leh D hmanga ṭhendarh a ni. League D hian playoff-ah quota an nei ve lo a, League dang pathum League A, B leh C te chuan hmun ruak pakhat ṭheuh an nei.

Nations League hi an khelh zawh tawh avangin league tin aṭanga playoff khel thei tur chu a hriat theih tawh. League A-ah Netherlands, Croatia, Spain leh Italy te playoff khel thei dinhmunah an ding a, chutihrualin heng team pali hi qualifier hmanga an tling a nih chuan a hnuaia team-ten a hmun ruak hi an inchuh ang.

League B-ah Israel, Bosnia & Herzegovina, Serbia leh Scotland te chu a ti ṭha pali an ni a, League C-ah Georgia, Greece, Turkey leh Kazakhstan te playoff khel turin an tling sa tawh bawk.