Adebayor-a'n boot a khai ta

Emmanuel Adebayor chuan instagram kaltlangin football khelh a chawlhsan thu a puang. Kum 39 mi Adebayor hi Arsenal, Manchester City leh Real Madrid tan a khel tawh a, Togolese club AC Semmasi-ah a hun tawp a hmang.

Arsenal striker hlui Adebayor chuan, "Chet ṭhat chang leh chhiat chang nei mah ila, ka football zinkawng hi a ropui ka ti. Ka inkhelh chhunga min thlawp ṭhintu fan-te chungah lawmthu ka sawi a, chona thar hmachhawn pawh ka phur hle," tiin a sawi.

Adebayor hi February 26, 1984 khan Lome, Togo-ah a piang a, an khaw club AC Merlan Lome-ah bul a ṭan. Kum 1999 khan Europe-ah insawnin kum 15 mi a nihin French club FC Metz youth team a zawm.

Metz aṭangin AS Monaco a zawm a, football club ṭha Arsenal, Manchester City, Real Madrid leh Tottenham tana a khelh hnuin Crystal Palace, Istanbul Basaksehir, Kayserispor leh Olimpia-ah te a khel kual a, kum 2021 khan a hun tawp hmanna Semassi hi a zawm.

Adebayor hian a career-ah match 593 khelin goal 207 a khung a, chung zingah chuan Premier League match 242 aṭanga goal 97 a khung pawh a tel. An ram Togo tan match 65 aṭangin goal 26 a khung a, ram tana goal khung tam ber niin kum 2008 khan African Footballer of the Year-ah thlan a ni bawk.