CYMA Sports thupui 'Ruihhlo do la, i ram chhan rawh'

Central YMA chuan kumin chhungin branch inelna pathum Football, Table Tennis leh Carrom inelna a buatsaih dawn a, kumin chhung thupui atan 'Ruihhlo do la, i ram chhan rawh' tih chu thlan a ni.

Mizo ṭhalai ṭhahnem tak ruihhlo bawihah an tang a, infiamna hi ruihhlo tlansanna ṭha tak a ni. Central YMA chuan infiamna chawi nun paha Mizo ṭhalaite tan thuchah neih tel a ṭha a ti a, ruihhlo do hi a thlang.

4th Inter Branch YMA Table Tennis Tournament hi April 8, Inrinni zan hian CYMA Hall, Tuikhuahtlangah a ṭhuai hawnna (Spin off) neih a ni dawn a, entry fee Rs 500 chu CYMA Office, Tuikhuahtlangah a pek theih. Football inelna hi May thla laihawlah neih tum a ni a, Carrom inelna neih hun hi tihchian a la ni lo.