Kawng sira naupang inkhel an tlem ta - Roberto Mancini

Italy manager Roberto Mancini chuan ram tana player thlan tur an tam tawk lo tih a sawi a, a bik takin Serie A khel player-te chu ram tana thlan khawp awm mah se an tam lo tih a sawi - a chhan nia lang chu naupang inkhel an tlem vang niin a sawi bawk.

Tun hnai khan England manager Gareth Southgate chuan Premier League-ah English player an tlem tial tial tih a lo sawi tawh bawk a, Three Lions leh Azzurri te hian an duh ang player thlan khawp an hmu rih lo niin a lang.

Italy coach Mancini chuan, "A chhan tak chu ka hre bik lo, mahse striker duh thlan tur kan nei lo hle, tlarhma lama khel thei chu mi tlemte chauh an ni," a ti. Euro 2024 qualifier khel tur striker a mamawh.

Italian football hian a vanglai a pel tawh rih nia ngai an awm. A nihna takah chuan European club lian dangte angin Serie A club-te hi an ṭha tawk lo ni pawhin a lang, mahse tun season Champions League quarterfinal-ah erawh team pathum an nei.

AC Milan, Inter Milan leh Napoli ten UCL quarterfinal an lut vek. Mancini chuan, "Champions League quarterfinal khel tura Italian team pathum kan nei hi a lawmawm, mahse a nihna takah chuan heng team pakhatah hian Italian player pasarih vel zel awm thei se," a ti.

Serie A goal khung hnem ber - Champions League lama an rinrawl ni bawk chu Victor Osimhen a ni, ani hi Nigeria international a ni. Serie A goal khung hnem zual 10 zingah Ciro Immobile chauh chu Italian player awmchhun a ni mek.

Lazio forward Immobile hi hliam vangin a chawl mek. Forward a koh zingah hian kum 19 mi chauh, Leeds United forward Wilfried Gnonto a tel - Italian coach chuan Gnonto te hian Serie A khel thei se a duhthusam tih a sawi bawk.

Italian manager Mancini chuan, "Tun hma kha chuan kawng sirah darkar thum chuang te kan inkhel a, chumi hnuah training nei turin kan kal leh ṭhin. Mahse, tunah chuan chutiang chu a ni ta lo - Uruguay, Argentina leh Brazil ramah chuan kawng sira football khel an la awm," a ti.

Mancini thusawi aṭangin Europe khawmualpuiah chuan kawng sira inkhel an tlem tih a lang chiang, an ram a hausak vangin hmunhma ṭhaah an inkhel thei tawh tihna a ni. Chutihrualin, naupangin football an atchilh tawk lo a tihna a kawk zawkin a rinawm.

South American ramte khuan football an atchilh hle, ram rethei zawka ngaih Africa khawmualpuiah pawh khawlaiah an la inkhel nasa, hei hian football an atchilh tih a lantir bakah, kawng hrang hrangin taksa paukhauhna a siamsak tih chu a takin a lang.

Italy hi Euro champion lai ni mah se Qatar World Cup khel turin an tling lo a nih kha, tunah chuan Euro 2024 qualifying lam an ngaihtuah a ngai. Ningani zan dar 1:15 hian an qualifying match hmasa ber atan England an mikhual ang.

Italy Squad:

Goalkeepers: Gianluigi Donnarumma, Wladimiro Falcone, Alex Meret, Ivan Provedel.

Defenders: Francesco Acerbi, Leonardo Bonucci, Alessandro Buongiorno, Matteo Darmian, Giovanni Di Lorenzo, Emerson Palmieri, Alessio Romagnoli, Giorgio Scalvini, Leonardo Spinazzola, Rafael Toloi.

Midfielders: Nicolo Barella, Bryan Cristante, Davide Frattesi, Jorginho, Lorenzo Pellegrini, Matteo Pessina, Sandro Tonali, Marco Verratti.

Forwards: Domenico Berardi, Federico Chiesa, Wilfried Gnonto, Vincenzo Grifo, Simone Pafundi, Matteo Politano, Mateo Retegui, Gianluca Scamacca.