Khualmualah Curry hoin GSW an chak

Tun hnaiah Golden State Warriors hian khualmualah result an nei chhe thei hle, match 11 ngawt an chak lo zawn. Nimin zingah erawh Stephen Curry leh Klay Thompson te hoin Houston Rockets chu 121-108 in an hneh.

Hnehna an chan theih nan Curry-a'n point 30 a nei a, a ṭhianpa Thompson hian point 29 a nei ve thung. Western Conference-ah parukna dinhmun luahin playoff khel ngei turin an dinhmun chu an la siam zel.

Tun season kal laiah Golden State hi anmahni khelmualah chuan team hlauhawm an ni, vawi 29 chakin ṭum sarih an tlawm. Mahse, khualmualah erawh vawi 29 tehmeuh an tlawm tawh a, ṭum riat an chak ve hram chauh a ni.

Thawhṭanni inkhelah Los Angeles Lakers chuan Orlando Magic 111-105 in an lo hneh tawh a, regular season bikah khelh hmabak 10 chauh awm tawh chungin playoff an la beisei ve zel.

Western Conference table-ah Lakers hi 11-na an ni mek, player ṭha bik LeBron James bakah Anthony Davis te awmna team hian season an hmang fuh tawk lo, hliam leh harsatna dangin a tlak buak nasa bawk - an tan playoff khelh phak chu chanchin ṭha a ni ang.