Swiss Open lamah Indian player inlan dawn

PV Sindhu chuan tun kar chhunga khelh tur BWF Swiss Open Super 300 event-ah a nomawi humhim ngei a tum dawn, tunlai a khelh dan nena chhut chuan thil awlsam tak a ni lo mai thei.

Tournament hi March 21-26 chhungin Swiss khawpui Basel-ah khelh a ni dawn. Sindhu bakah hian Indian player ṭha dangte pawh an inlan dawn a ni.

Sindhu hian season a hmang chhe hle, kumina tournament a khelh tawh hoah second round inhlankaina a la nei miah lo. Olympic medal pahnih la tawh hian a match hmasa berah tualchhung nula Jenjira Stadelmann a hmachhawn dawn.

First round inkhel dangah Saina Nehwal leh Lalinrat Chaiwan an intum dawn. Indian player pahnih hi an chak ve ve a nih chuan second round-ah an inhmachhawn nghal thei dawn a ni.

Mipa singles lamah, season hmasa finalist HS Prannoy chu seeded pangana pek a ni a, All England Open runner-up Shi Yu Qi nen an intum nghal dawn avangin a hmabak a awlsam dawn vak lo.

Commonwealth Games gold medallist Lakshya Sen chu seeded pariatna pek niin, ani hian Chinese tlangval Lee Cheuk Yiu a tum thung ang. Kidambi Srikanth chuan Weng Hong Yang a tum thung dawn a ni.