England squad aṭangin Rashford leh Mount inhnukdawk

Euro Championship 2024 qualifier khel tura England squad-a koh, Manchester United striker Marcus Rashford, Chelsea midfielder Mason Mount leh Newcastle United keeper Nick Pope te chu Three Lions squad aṭangin an inhnukdawk a, England tan an inlan thei dawn lo.

Tun season-a form em em mai Rashford hi FA Cup quarterfinal-a Fulham an hneh ṭumin a inhliam a, Three Lions tan a inlan thei dawn lo - kum 25 mi Rashford hian season duhawm tak hmang mekin, United tan match 44-ah goal 27 khungin assist vawi kua a nei a, heng zinga goal 19 chu Qatar World Cup zawha a khung a ni.

England manager Gareth Southgate-a'n Mason Mount pawh ko mah se kum 24 mi midfielder hian England squad a zawm dawn lo a, February-a a inhliam hnuah Mount hi Blues tan a inlan leh tawh lo a ni.

Hetihlai hian England tana vawi 10 inlan tawh Pope pawhin Three Lions squad a zawm dawn lo a, ani hi Newcastle United-in 2-1 a Nottingham Forest an hnehna inkhelah a inhliam a ni.

Magpies-in season thara Champions League an beisei theihna tura khel ṭha tak Pope hmun ruak luah tur hian Tottenham Hotspur keeper Fraser Forster chu koh a ni a, kum 35 mi keeper hi ram tan vawi ruk a inlan tawh.

Forster hi ram tana a inlan hnuhnung ber chu kum 2016 kha niin, season hmasa khan friendly match pahnihah koh ni mah se a inlan phak lo. England chuan thuchhuah siamin, "Midang koh tumna a awm tawh lo a, Thawhṭanni khan player 23-te chu St. George's Park (England training-na hmun) ah an thleng a ni," an ti a, Rashford leh Mount hmun ruak luah tur an ko tawh chuang lo.

England hian Euro qualifier khel turin, March 23 zanah Italy lenchilhin, March 26-ah Ukraine an mikhual leh bawk ang.

England Squad

Goalkeepers: Jordan Pickford (Everton), Aaron Ramsdale (Arsenal), Fraser Forster (Tottenham Hotspur)

Defenders: Ben Chilwell (Chelsea), Eric Dier (Tottenham), Marc Guehi (Crystal Palace), Reece James (Chelsea), Harry Maguire (Manchester United), Luke Shaw (Manchester United), John Stones (Manchester City), Kieran Trippier (Newcastle United), Kyle Walker (Manchester City)

Midfielders: Jude Bellingham (Borussia Dortmund), Conor Gallagher (Chelsea), Jordan Henderson (Liverpool), James Maddison (Leicester City), Kalvin Phillips (Manchester City), Declan Rice (West Ham)

Forwards: Phil Foden (Manchester City), Jack Grealish (Manchester City), Harry Kane (Tottenham), Bukayo Saka (Arsenal), Ivan Toney (Brentford)