Palace-in Roy Hodgson an ko kir!

Hmangaih thawnthu ang mai a ni a, Crystal Palace leh Roy Hodgson an inṭhen hleithei lo - Premier League club Palace hian coach Patrick Vieira an ban hnuah a thlak turin an coach hlui Hodgson-a lam bawk an hawi a, English coach hian season tawp thleng Palace hi a enkawl ang.

Kum 75 mi Hodgson hian 2017-2021 inkar kha Palace hi a lo enkawl tawh a, July 2021 khan Vieira chuan a thlak. Mahse, March 2023 a herchhuah meuh chuan Vieira ban a ni a, a hmaa a thlak tak Hodgson-a'n a a thlak ve leh ta thung!

Arsenal legend Vieira hian ban a nih lai hian inelna hrang hrangah match 12 chhung chu Palace a chakpui thei lo a, Premier League table-ah 12-na ni mah se, 18-na Bournemouth aiin point thum chauhin an sang a, an dinhmun a him lo hle.

A tawpah chuan Vieira-a'n a tuar a, kum 46 mi coach hi a chhuahna tur kawng kawhhmuh a ni. Palace hian Vieira an ban hnuah league match khat khel leh tawhin, Arsenal lakah 4-1 ngawtin an tlawm - a tawpah chuan an coach hlui lam bawk an hawi.

Hodgson hian Palace a chhuahsan hnuah January - May, 2022 inkar khan Watford a enkawl leh tawh a, mahse, Championship lama an tlak hnuah a chhuahsan. Hodgson hian Watford a chhuahsan hma hian a chawlh hahdam tur thu a sawi a, Premier League club dang enkawl a beisei tawh loh thu a sawi bawk.

Mahse, a tawpah chuan Palace bawk an lo lang a, Hodgson a kir dawn. English coach chuan, "He club-a kir tura koh ka ni hi ka tan chuan chawimawina a ni a, ka tan chuan a hlu takzet a ni.

"Tuna kan tum ber tur chu hnehna chan chhoh a, Premier League kan cham chhunzawm zel theih nana point hmuh chhoh a ni," a ti a, Selhurst Park-ah hna ṭha tak thawh a tum.

Hodgson-a rual hian Palace-a a assistant hlui Ray Lewington chu assistant manager ni turin a kir ve leh bawk a, ani bakah hian Arsenal laka an mualpho ṭuma coach lailawk Paddy McCarthy chuan assistant manager hna a chelh ve bawk ang.

Palace chairman Steve Parish chuan, "Roy leh Ray te he club-ah ka lo lawm a, kan dinhmun hi harsa hle mah se anni pahnih tawnhriat, club leh player an hriatchianna te hi Paddy te nen thawk hoin, Premier League-a kan inhamtan zel theih nan kan chhawr theih ka beisei a ni," a ti.

International break hman mek a nih avangin Hodgson hoa Palace match hmasa ber chu April 1-ah khelh a ni dawn a, table-a 17-na ni mek Leicester City an mikhual ang.