Marquez an zai nawn

MotoGP world champion Marc Marquez chu tun hnai chawlh kar hnih chhunga a vawi hnih nan zai a ni a, a chawlh chen tur chiang rih lo mah se August 9-a tlan tur Czech Republic Grand Prix-ah chuan a inlan theih beisei a ni.

July 19 khan Jerez tlan kawngah MotoGP season khuh hawnna neih a ni, he intlansiakah hian champion lai Marquez hi che sualin a ban ruh a titliak a, a chet sualna vang hian Repsol Honda rider hi zai a ngai hial. Barcelona-ah an zai a, zai a nih aṭanga ni hnih hnu lekah bike a khalh leh theih mai tur thu an puang. Mahse, Andalucia MotoGP aṭangin a inhnukdawk a, hliam dam chiang lo chunga inlan chu team lamin an remti lo.

Thawhṭanni zan khan zai nawn leh a ni a, amah zaitu doctor Xavier Mir chuan, "Ni 13 chhunga a vawi hnih nan Marc Marquez chu zai a ni a, natna leh insawiselna nei lo mah se a dinhmun endik a nih hnuah siamṭhat ngai lai chu siamṭhat a ni. "Damdawi inah hian darkar 48 chhung vel a dinhmun ngaihchan a ni ang a, chumi hnuah harsatna a nei lo a nih chuan a chhuak thei ang," a ti. Xavier Mir hian tun kar tawpa intlansiak a hmachhawn dawn leh dawn lo chu a la sawisak thei lo.

MotoGP vawi ruk champion tawh Marquez hi kuminah pawh rinkai ber a ni. Mahse inelna hmasa berah a tlan thei lo a, a pahnihnaah a inlan thei lo bawk. Point a la hmuh loh lai hian a elpui Yamaha rider Fabio Quartararo chuan point 50 a khawl tawh thung - nomawi humhim a harsa dawn.