Football player zinga hremna lian tham hmachhawnte; Hremna lian tham hmachhawn tur Mitrovic?
Fulham-in FA Cup quarterfinal-ah Pathianni zan khan Manchester United an hmachhawn a, 1-0 in hma hruai hmasa mah se player chesual vang leh insum zawh loh vangin Eric Ten Hag-a hoten 3-1 in an lehthal.
Thil danglam hi minute 70-naah a thleng. Counter attack hmangin United-in an chhu let a, Antony ball pass ṭha chu Jadon Sancho-a'n laltuin keeper Bernd Leno a paltlang hnuah pet nghal mai loin Harrison Read a bum hnuah goal-ah petin Willian-a'n a dang.
Corner kick tura ngaih ni mah se VAR hmanga ennawn a nih hnuah Brazilian midfielder hian a kut a hmang tih hmuh a ni. Referee Chris Kavanagh-a'n mual sira inhrosa Fulham manager Silva chu a hnawt chhuak phawt a, kut hmanga goal theihna dangtu Willian chu dan angin red card a pe leh bawk.
Mitrovic a insum zo lo a, thinrim taka referee a nam avangin Serbian striker pawh hi hnawhchhuah a ni. Fulham striker hi dan pangngaiah chuan match thum khel thei lo tura hrem tur a ni a, FA-in match thum aia tam an hrem dawn.
FA chuan, "Kut thawh chungchanga hremna awmsa chu Aleksandar Mitrovic chet danah a tawk dawn lo. Hnawhchhuah a nih hnua Mitrovic a chet dan leh ṭawngkam hman chu ngaihtuah tel a ni bawk ang," tiin thuchhuah an siam.
Premier League-a Blackburn champion pui tawhtu Chris Sutton chuan match 10 tal hrem a phu thu a sawi a, Referees' Association hotu Paul Field pawhin, "Match 10 aia a tam ka beisei. Amateur level-ah phei chuan kum khat chhung an hrem a, professional game-ah pawh na takin an hrem tur a ni," tiin a sawi a, player-te leh fan-ten nungchang mawi zawk an neih theih nan hremna na zawk a phut thu a sawi a ni.
Football Association chuan Fulham striker Aleksandar Mitrovic chungah hremna pangngai a tawk dawn lo tih an tarlang a, direct red card hi match thum hremna niin Serbian striker hian match thum aia tam hremna a hmachhawn ngei dawn niin a lang.
Football khawvelah hian chet mawi loh leh damdawi hman phal loh hman vangin player ṭhahnem takin hrem an lo tawk tawh a, thla chuang fe hrem pawh an awm. Tun ṭumah hian hremna lian tham hmachhawn tawh player-te kan rawn tarlang e.
1. Arthur Masuaku (Match ruk) :
January 2018 khan West Ham defender Masuaku chuan FA Cup fourth round-a Wigan Athletic an hneh loh ṭumin Nick Powell chil a chhak khum a, DR Congo defender hian ngaihdam dil mah se hremna erawh a pumpelh lo. Masuaku hi match ruk chhung khel thei lo tura hrem a ni.
2. Luis Suarez (Thla li) :
World Cup 2014-a thil thleng kha khawvelin an hre reng tawh ang. Uruguayan forward Luis Suarez chuan Italy defender Giorgio Chiellini a seh a, FIFA-in football kaihhnawiha tel thei lo turin thla li chhung a hrem.
Suarez hian Ajax tana a khelh laiin kum 2010 khan PSV midfielder Otman Bakkal chu a seh tawh a, kum thum hnuah Liverpool tana a khelh laiin Chelsea defender Branislav Ivanovic chu a banah a seh leh bawk. Hemi ṭum hian FA chuan Suarez hi match li khel thei lo turin a hrem a ni.
3. Paolo Di Canio (Match 11) :
Kum 1998 khan Sheffield Wednesday forward Paulo Di Canio chuan referee Paul Alcock a nam thlu a, match 11 khel thei lo tura hrem a nih bakah £10,000 chawitir a ni.
4. Kolo Toure (Thla ruk) :
Kum 2011 khan Manchester City defender Kolo Toure chuan drug test a paltlang loh avangin thla ruk chhung an hrem. Ivorian defender Toure hian intih chak tum vang ni loin hriat loh avangin a nupui damdawi a ei tih erawh FA chuan a pawm thung.
5. Adrian Mutu (Thla sarih) :
Kum 2004 khan Andiran Mutu chu cocaine a ti tih hmuhchhuah a nih avangin FA chuan thla sarih chhung a hrem a, a club khelhna Chelsea-in an ban bawk.
Romanian forward Mutu hi English football-ah hmuh tur a awm zui lo. Kum 2010-ah Mutu hi Fiorentina tana a khelh laiin damdawi chi khat 'anti-obesity pills' hman vangin thla ruk chhung hrem a ni leh bawk.
6. Rio Ferdinand (Thla riat) :
December 2003 khan Manchester United defender Rio Ferdinand chu September 2003-a drug test huna a inlan loh avangin thla riat chhung an hrem. Ferdinand chuan a bazar vanga test hun theihnghilh a nih thu a sawi a, FA chuan English defender thusawi hi pawm loin an hrem ta tho.
7. Eric Cantona (Thla kua) :
Kum 1995 khan Eric Cantona chuan amah au eltu Crystal Palace ṭantu pakhat chu a tlawh (kungfu kick). FA chuan Manchester United forward hi thla kaw chhung khel thei lo turin a hrem a, khawtlang tan darkar 120 chhung hna a thawk bawk.
8. Mark Bosnich (Thla kua) :
April 2003 khan Australian keeper Mark Bosnich chu cocaine a hman avangin thla kaw chhung hrem a ni a, a club khelhna Chelsea-in a contract an titawp bawk.
9. Diego Maradona (Thla 15) :
Khawvela player ropui ber ang hiala mi ṭhahnem takin an chhal Diego Maradona chu 1994 World Cup khel turin a rawn kir a, Greece laka 4-0 an chak aṭanga ni kuanaah Argentine forward hi cocaine leh ephedrine a hmang tih hmuhchhuah a ni. Maradona hi thla 15 chhung hrem a ni a, ram tan a inlan leh tawh lo.
10. David Layne, Tony Kay leh Peter Swan (Dam chhung, a hnuah kum sarihah an titlem) :
Kum 1960 tir lam khan match fixing-in English football a run. Sheffield Wednesday player pathum David Layne, Tony Kay leh Peter Swan te chuan an team chak lo turin pawisa an thap a, £100 an hlawh. Thil awm dan chhui chian hnuah match fixing dang ṭhahnem tak hmuhchhuah a ni a, palyer khel lai leh chawl tawh 10 ngawtin jail bang an zut phah. Layne, Swan leh Kay te hi damchhung inkhel thei lo tura hrem an ni a, a hnuah kum sarihah tihtawi a ni.