Nipui transfer: Liverpool-in inthuam ṭhat an mamawh em?

Premier League-ah Liverpool an champion a, anmahni hnaih bertu Manchester City aiin point 18 ngawtin an sang fal - Liverpool-in hneh takin Premier League an thunun a, inthuam ṭhat an mamawh em? tih chu zawhna awm a ni ta. 

Liverpool elpui zingah Manchester City, Manchester United, Chelsea, Arsenal leh Tottenham Hotspur ten transfer bazar-ah thawm an nei ṭan der tawh a, sum pawh a maktaduai tel takmeuhin an seng leh ṭan tawh. 

Hetiang karah hian Liverpool erawh an 'reh' a, fan-ten an beisei ang transfer bazar thawm hriat tur reng reng an nei lo. Liverpool boss Jurgen Klopp-a'n season zawh hma khan Covid-19 vangin sum tam tham hman tur an neih loh thu a sawi tawh.

Reds hi Timo Werner nen sawizawm reng an ni a, German striker ṭha hian Klopp-a hnuaia khelh pawh a chak - mahse ani ang player meuh lalut tur khawpin Liverpool hian pawisa an nei lo a, Chelsea lamah a kal zui. 

Tlarhnung lam 

Liverpool defence-ah Trent Alexander-Arnold, central defender Virgil van Dijk & Joe Gomez leh left-back Andy Robertson te chu regular player an ni a, centre back-ah hian Joel Matip leh Dejan Lovren chu 'cover' atan hman an ni ṭhin. 

Mahse, Lovren hian Zenit St Petersburg-a zawm avangin Reds-in Croatian defender hmun ruak luah tur an zawn a ngai tihna a ni. Matip hi Paris Saint-Germain chuan pound maktaduai 50-in an duh nia sawi a ni bawk a, mahse kum 28 mi defender hian nikum Ocotber khan contract thar a ziak a, a chhuah a rinawm loh zawk. 

Klopp hian season hmasaa loan-a Stuggart lama a kaltir Nathaniel Phillips a nei leh tawh a, kum 18 mi ve ve Sepp van den Berg leh Ki-Jana Hoever a nei bawk. Player naupang chunga rinna a nghah ṭhin dan ngaihtuahin Klopp hian centre-back a lei belh a rinawm chiah loh.

Matip hralh leh hralh lohin a hril thui thei viau bawk. Right back-ah Arnold thachhang dawl turin kum 19 mi Neco Williams hi a ṭha tawk tih kan hmu tawh a, right back thar chu an lei lo ang. Season hmasaa Reds player hahdamna hun nei tlem tak chu Robertson a ni a, kum 19 mi Yasser Larouci chu chhuah a tum bawk si avangin midfielder James Milner chu Robertson-a hmun ruak luah thei awmchhun a ni - a tawi zawnga sawiin Liverpool-in left back an mamawh a, big signing a nih kher erawh a ngai lo thung. 

Liverpool hi Bayern Munich midfielder Thiago Alcantara nen sawizawm an ni a, zawhna awm erawh Reds hian Spain international hi an mamawh kher em? tih hi a ni. 

Reds khelh danah full back pahnih chu attacking puitu an ni a, tlarhmaah player pathum an awm bawk - mahse, chutah tak chuan midfield-a lehlamin an rawn nawr let tur dang chattu tur an awm a ngai a, chu hna chu Fabinho, Jordan Henderson leh Georginio Wijnaldum-ten tlin takin an thawk. 

Liverpool hian Adam Lallana chan mah se tlarhma nawr nuam ti midfielder an duh a nih pawhin Alex Oxlade-Chamberlain, Naby Keita leh chhuak tur anga sawi Xherdan Shaqiri an la nei cheu a, Curtis Jones pawh thachhang dawltu tur chuan rintlak a ni - loan hmanga chhuak Marko Gurjic leh Harry Wilson an kir tawh bawk. Reds tan a khelh laia league nomawi vawi hnih lo chawi tawh John Barnes chuan, "City hian midfield-ah creative player eng zat nge an neih? Mahse, point tam takin Liverpool an phak lo tho a ni. City zawk hian Reds kan umphak theih nan anmahni ang hian midfielder thawkrim neih tum ang an lo ti zawk mai thei asin," a ti!

Liverpool hian tlarhmaah Roberto Firmino, Sadio Mane leh Mohamed Salah an nei a, player pathum hian Klopp-a hnuaia an khelhho hnuah goal 250 chuang an khung tawh - thlak an ngai lo tih hei hian a hrilhfiah chiang hle. 

Reds striker hlui Emile Heskey chuan, "Liverpool goal tam zawk hi wing aṭanga lut a ni a, chumi a ni theihna tur atana hnathawktu chu Firmino a ni. An pathum inkawp fuh dan hi en ila, striker langsar lalut se, thil awm nghet tawh sa an ti chhe mai mai thei a ni," a ti. 

Mane leh Salah hi wing angin awm mah se ball cross tu ni loin a laia tlan luh chu an hna a ni a, Firmino hi a laiah awm mah se player pahnih tana hnathawktu tiin a sawi theih - false nine anga khelin a ball thiamna leh mit finna chu Salah leh Mane par tirtu a ni. Hei tak hi Liverpool-in Thiago an mamawh lohna tiin a sawi theih bawk - Firmino hian playmaker angin hna a thawk thei a, chu chu Salah leh Mane ten lo chhawrin wing aṭanga ball thlawh lut turin Arnold leh Robertson an awm bawk. 

Liverpool hian transfer window hnuhnung pahnihah khan rawlthar defender Van den Berg, keeper pahnih Adrian & Andy Lonergan leh forward Takumi Minamino chiah an lalut - an sum sen zat chu pound maktaduai 8.55 chauh a ni. 

Reds squad en ila, season tharah pawh an elpui leh ber tur nia lang Manchester City aiin an squad hi a chhah lo zawk tih loh rual a ni lo - mahse Klopp-a tana bul ṭantu regular en ila, player inmanzia thlirin Reds team hi kan thlang zawk hialin a rinawm. 

Mahse, chumiin a hrilhfiah tel nghal chu Liverpool hian squad chhah an mamawh tih hi a ni a, Klopp hian a player chhuahtir zat tal chu first XI kher tur ni loin bench-a ṭhu tur talin a zawn a ngai. Liverpool hi Thiago bakah kum 19 mi Arsenal striker Folarin Balogun leh Wolverhampton Wanderers winger Adama Traore te nen sawizawm an ni a, player pahnih hi an lalut a nih chuan squad tichhahtu tur an ni ang.