Euro 2024 Qualifier: Italy-ah England an zin

International break a ni a, football ngainatute tan ennawm erawh a bo phah dawn lo - Euro 2024 qualifier khelh ṭan a ni a, football thiam tamna Europe khawmualpui ramten nakkuma European Championship khelh tumin inelna an hmachhawn dawn.

Zanin dar 1:15 aṭangin inkhel hmuhnawm en tur a awm nghal dawn a, Italy khelmualah England an zin dawn - Euro hnuhnung ber final-ah khan team pahnih hi an lo intawng tawh a, penalty hmangin Azzurri an champion. UEFA Nations League-ah vawi hnih an intawng leh a, Italy hi vawi khat an chak a, vawi khat an in draw bawk.

England-in Euro qualifier-ah tal phuba lak an châk ang tih a chiang a, hetihrual hian Italy hi European champion ni chunga World Cup 2022 inpetkai zo lo an ni a, a zawna major tournament khelh loh an duh dawn lo.

Team pahnih hi group C-ah awmin, Ukraine, North Macedonia leh Malta chu an group-a awm ve an nih bawk avangin chetsual theih a ni - chuvangin zanina hnehna chan nghal hi an tan a pawimawh dawn. Inkhel hi Sony Ten network lamah live-in a en theih ang.

Kim lo England

hnaia form bera chhal ngam chu Marcus Rashford a ni a, mahse, tun season-a goal 27 zet khung tawh forward hian hliam vangin Three Lions squad a zawm thei lo.

Mahse, England tan lungphan lutukna tur erawh niin a lang lo a, tlarhmaah Harry Kane awmin, Arsenal forward Bukayo Saka leh Jack Grealish ten an thlawp thei ang. Midfield-ah Liverpool captain Jordan Henderson, Declan Rice leh Jude Bellingham te chu inkawp tura ngaih an ni.

Harry Maguire-a'n Manchester United tan khel phak lo mah se coach Gareth Southgate-a duhsakna a chan chhunzawm zel avangin zaninah pawh inlan tura beisei a ni a, tlarhnung laiah City defender John Stones nen inkawp tura ngaih an ni.

Southgate-a'n Ben White leh Trent Alexander-Arnold mamawh loa inhriain a ko lo a, City right back Kyle Walker leh United left back Luke Shaw a nei - Jordan Pickford bawkin si ban a nghak leh tura ngaih a ni.

Kane a tan record?

Napoli khelmual Diego Armando Maradona Stadium-ah England leh Italy hi an inkhel dawn a, Naples khawpuia khelmual danglam bikah hian Kane-a tan record thar siam theihna chance a inhawng dawn.

Tottenham Hotspur striker hian England tan match 80-ah goal 53 khung tawhin, United legend Wayne Rooney nen Three Lions tana goal khung hnem ber an ni mek - zaninah Kane hian goal a khung chuan Rooney tlansanin, ama pualin record a chelh ang.

Southgate chuan, "Player, mahni inringtawk tak a la ni reng a, theihtawp chhuah turin a la inpeih reng a, goal khung a la châk reng bawk. Spurs tan mellung pawimawh tak tak a phun a, kan bulah pawh chu hmabak chu a nei zel a ni," a ti a, a striker a fak hle.

Italy tan Kane hi ven bik a sual lo ang tih a chiang a, chutihrual chuan Saka hian tun season-ah goal 13 khung a, assist vawi 10 a neih tawh bawk avangin ngaihthah a thiang bik lo ang.

Beiseina nen...

World Cup 2018 an khelh loh hnuah Italy an indinthar a, coach thar Roberto Mancini hoa team siam ṭhain, Euro 2020-ah an champion. Mahse, Italy hlim chhung a rei lo hle - World Cup 2022 an inpetkai zo lo a, a zawnin World Cup an khel lo!

Italy hian World Cup qualifier-a an group-ah Switzerland phak loin pahnihna an ni a, playoff an khelh phah - awlsam taka an hneh mai tura ngaih North Macedonia an ngam loh zui avangin World Cup an inpetkai zo lo a, an mualpho hle.

Azzurri hi UEFA Nations League lamah insiamṭha zuiin, semifinal hial an inpetkai a, tuna zawhna chu Euro qualifier lamah an insiamṭha zui thei ang em, tih hi a ni a, England an tawn nghal dawn avangin a awlsam lo ang.

Italy tan striker chhuanvawr Ciro Immobile chu hliam vangin a inlan thei dawn lo a, team thar din mektu Mancini-a'n tlarhma engtiang takin nge a rem ang hriat a châkawm - tuna a tlarhma player neih zinga ram tana goal khung hnem ber chu Domenico Berardi a ni a, goal ruk chiah a la khung thung.

Team thar Italy?

Mancini-a'n Italy team din thar a tum tih a squad koh hmangin a lantir zel a, England hmachhawn tur zingah Argentina mi, an ram club Tigre tana khel mek Mateo Retegui a ko - kum 23 mi forward hian a thlahtute aṭangin Italy tana khelh theih dan a nei a ni.

Vincenzo Grifo hi kum 29 ni tawh mah se ram tan match riat chiah a la khel a, goal li a khung tawh thung. Bundesliga club SC Freiburg tana khel mek striker hian tun season-ah match 35 aṭangin goal 14 a khung tawh a, bul a ṭan a nih pawhin a mak lo ang.

Tlarhnung lam hi kum 35 mi Leonardo Bonucci-a'n a la ho thei a, Napoli right back Giovanni Di Lorenzo, AS Roma wing back Leonardo Spinazzola, Lazio centre back Alessio Romagnoli leh Inter Milan defender Francesco Acerbi te ho an la awm a, si ban nghak turin Paris St-Germain keeper Gianluigi Donnarumma a la awm bawk.

Midfield-ah PSG thiampuipa Marco Verratti, Arsenal midfielder Jorginho leh Inter Milan midfielder Nicolò Barella te ho an la awm a, Mancini leh a naute hi England laka chak tum ngam tur khawpin an ṭha tawk.