Football mawina belhchhahtu Ozil-a'n a chawlh thu a puang

Mesut Ozil-a'n football khelh a chawlhsan thu nimin khan a puang. Real Madrid leh Arsenal midfielder hlui Ozil hian kum 2014 khan Germany chu FIFA World Cup-ah a champion pui a, a hlawhtlinna piah lama football ngainatute hriat reng tur chu football mawina a belhchhahna lai hi a ni.

Ozil hi October 15, 1988 khan Gelsenkirchen, West Germany-ah Turkish nupa inkarah a piang a, football thiamna pianpui an tih zinga mi niin khelmual chhunga a ball khawih hi a naupan lai aṭangin a dak ṭha hle.

Schalke 04 aṭangin Ozil hian hming a chher a, kum 2009 khan Germany chu Euro U21 C'ship-ah a champion pui. Hetihlai hian Shalke aṭangin Weder Bremen-ah insawn tawhin kum 2010 khan khawvel club ropui bera sawi Real Madrid a zawm.

Ozil hian Los Blancos hi La Liga leh Copa del Rey-ah te a champion pui a, kum 2013 khan Arsenal panin Gunners hi FA Cup-ah vawi li champion puiin Europa League-ah pahnihna a nihpui bawk.

Nimin khan Ozil hian a chawlh thu hi social media kaltlangin a puang a, a club khelh tawhna Schalke, Werder, Real Madrid, Arsenal, Fenerbahce leh Basaksehir bakah football-a ṭhiante chungah lawmthu a sawi.

Ozil-a hun tawn ropui ber erawh World Cup 2014-a Germany a champion pui kha a ni a, amaherawhchu 'politics' thil avangin Germany leh Arsenal-a a hun tawp lam erawh a hriatreng tlak lo. Real Madrid midfielder hlui hian chanchin duhawm lo chu nei bawk mah se football ngainatute erawhin football mawina a chhawpchhuah hi an hre reng tawh ang.