Premier League champion tum Arsenal dinhmun leh an hmabak bihchianna

Hma an hruai falna hi point riat a ni a, khelh hmabak 10 an la nei - Arsenal tan Premier League nomawi chawi beiseina a sang tawh, chutih rualin an khelh hmabak aṭanga point hmuh theih zat hi point 30 tehmeuh a la ni, thil thleng leh danglam thei a la tam hle.

A hnai zawnga sawi chuan Mikel Arteta naute hian an kut lehlamin EPL nomawi an khawih tawh, tia sawi theih a ni. A hla zawng erawh chuan, season thara Champions League khel tur pawhin an la tling chiang bik lo, a la ngaihnawm dawn chauh.

Boruak a fuh

Hmanni deuh lawk khan Manchester United manager Erik ten Hag chuan Arsenal a chhaih zauh, anni chuan season tluan deuh thawhin an player ṭha an chhawr deuh ṭhap ṭhap thei tih a sawi.

Mikel Arteta a rawn ṭawng ve nghal, an striker Gabriel Jesus leh Emile Smith Rowe te hliam vangin thla li an chawl tih a sawi a, player inhliam dang hming a lam chhuak nual bawk - manager pahnih hi an ṭan hmunah an dik ve ve.

Dutch manager Ten Hag sawi dikna chu, league match 21 an khelh chinah khan Arteta hian inkhel bul ṭantu vawi 14 a tidanglam - Premier League team zinga tidanglam tlem ber an ni, a ngai an ring nasa thei tihna a ni.

Arteta thusawi pawh a sual bik lo, striker rinrawl ber Jesus an chhawr thei lo rei - a thachhangdawltu Eddie Nketiah a inhliam ve leh a, striker nei loin match ṭhenkhat an khelh a ngai, thlasik bazara an lak Leandro Trossard hoin an khel ṭhin.

Striker pangngai nei lo mah se Gunners hian Bukayo Saka, Gabriel Martinelli leh Trossard te hmangin an mamawh zat goal an khung thei tho. Jesus inhliam hma khan point ngain an sang fal a, a lo kir leh hnuah pawh point nga thoin an sang.

Brazilian stirker hi mamawh viau mah se a tel lo pawhin an khel thiam tho tihna a ni. Spanish manager Arteta-a'n a duh dana khel thiam player a lakhawm a, mimal ṭha fala innghat loin thawhhona ṭha chu an thupui a ni - boruak a fuh laklawh tlat.

Beiseina chu

Arsenal hian 2003-04 season hnuah Premier League nomawi an la chawi leh lo, an champion hnuhnung bera nau piangte khan kumin MLA inthlan hunah chuan vote an thlak thei tawh dawn, a rei ta vang vang hle.

Statistics kan thlir chuan, match 28 an khelh china point riat emaw a aia tam emawa hmahruai thei chu an champion deuh zel, champion vek erawh an ni lo - team pathum champion lo an awm, a palina nih loh hram an tum a ngai dawn.

Kum 1997-98 khan Man United chu match 30 an khelh hnuah Arsenal aiin point kuain an sang zawk, mahse Gunners hian chhuhsakin an champion daih, a hnu kum ngaah United hian match 29 an khelh chinah point riata hniam chungin nomawi an chawi khalh ve thung.

Tun season kal lai kan thlir chuan United hi sawibo hmak theih ni lo mah se, an elpui ber erawh Manchester City an ni rih. Season tir leh tun thlengin Pep Guardiola naute hi champion tura ringtu an la tam zawk - squad neih dan chhutin a mak hran lo.

Mahse, Citizens hian EPL bakah Champions League quarterfinal khelh tur pahnih an la nei, an chak chuan semifinal match hnihin a zui ang - FA Cup semifinal a la awm bawk, April leh May thla chhungin match khelh tur an mamawh dawn malh malh hle.

Arsenal tan chuan Pep Guardiola enkawl Man City chunga awm hi a châkawm a ni satliah lo, striker ṭha bik Erling Haaland an nei chunga City nomawi chuhsak theitu an nih chuan khawvelin a theihnghilh ngai tawh lo ang - a tawi zawnga sawi chuan, engkim an kuta innghat a ni.

Hmabak hautak tur PANGA

Premier League team an intiattawk tlang a, a hniam bera awm Southampton leh 12-na Crystal Palace inthlauhna pawh point li chauh a ni, table laihawl leh a hnuai lam chu tumahin enhniam ngawt thei an awm lo.

Season tawp lamah phei chuan tlak hlau hi hmachhawn an châkawm ngai loh. Champions League khelh tum boruak a awm leh a - European football boruak leh champion tum boruak nen, a boruak lum dan inang lo mah se boruak a sang vek zel.

Inkhel awlsam a awm dawn tawh lo, chutih rualin Arsenal khelh hmabak 10 zingah hian zirchik mite chuan a harsa leh point hloh theihna tur nia ngaih an chhut a, inkhel hautak bik tura ngaih panga an la hmachhawn dawn.

Liverpool (A) - April 9

International break an hman zawh hnuah Leeds United hmangin bul an ṭan leh dawn, chumi hnuah chuan Liverpool khel turin Anfield an pan zui ang - Jurgen Klopp enkawl Reds hi Champions League khelh tum an ni a, a awlsam dawn lo.

Klopp-a naute hi tlak hlau Bournemouth 1-0 a hneh lo hlim an ni a, dah san an harsa. Mahse, a phek lehlam kan keu chuan Manchester United 7-0 a sawp thei team tho kha an ni, an khelh fuh ni chuan Arsenal point chhuhsak turin an ṭha tawk.

Reds hian palina Tottenham chu point sarihin an phak lo mek, match hnihin an khel tlem thung. Season thara UCL khelh an duh a nih chuan April thla chhunga an tum tur - Man City, Chelsea leh Arsenal lakah thapui an thawh vek ang.

Manchester City (A) - April 26

Mikel Arteta naute hian Etihad Stadium-a Manchester City luhchhuah tur chuan thil mak an tih a ngai dawn, tun season kal laiah pawh Citizens nen hian vawi hnih an inkhel tawh a, an chak lo ve ve a ni.

Premier League leh FA Cup-ah an ngam lo, squad an inneih chhah hleih bakah Arteta hi Pep Guardiola hnuaia inzir chhuak a ni, zirtirtu leh zir chhuak hlim chu an boruak a la danglam deuh tih pawh a lang.

Man City an lenchilh zawh hian, an khelh hmabak aṭanga point la hmuh theih zat chu 15 chauh a ni tawh dawn, mikhual chan chang tur Arteta naute tan point khat lek hlawh tuma fehchhuah pawh a fin thlakin a rinawm.

Chelsea (H) - April 29

Tun hma deuh kha chuan Chelsea hmachhawn hi team dang tan thil châkawm loh tak a ni ṭhin. Graham Potter enkawlna hnuaia an awm hnuah erawh beisei an la phak lo, chutih rualin squad an neih chhah miau avangin an khelh fuh ni chuan hlauhawm tak an ni.

Manchester City an lenchilh zawh chiahah Gunners hian Blues an mikhual dawn. Potter-a naute hi Premier League-ah che ṭha rih lo mah se, team ṭha hneh turin an ṭha tawk tih fiahna chu Champions League quarterfinal an lut thei tlat.

'European football' khelh ngei ngei an duh dawn a, chuvangin Arsenal tan chuan London Derby hi point hloh theihna tur langsar niin a lang, point thum an hmu tlang thei a nih erawh chuan hahdam takin May thla an thlir thei thung ang.

Newcastle (A) - May 6

Arsenal ṭantute chuan an la hre vekin a rinawm - Ben White-a'n anmahni lamah a ti lut a, midfielder Bruno Guimaraes chuan khung bawkin season hmasa khan Newcastle United hi Arsenal-in UCL an beiseina titawptua ngaih theih an ni.

Tun season kal laiah team pahnih hian nasa takin hma an sawn. Arsenal hi ṭhangkhat lian hnua champion leh tum an ni a - Magpies pawh a sang zual pali zinga tel phak tum ngam an ni mek, an inkhel hi a pawimawh dawn hle.

Eddie Howe-a'n a player hman thiam tur a lalut fuh thei hle, season hmasa lama Gunners natna an siamsak ang kha siam leh an hreh hauh lo ang tih pawh a chiang. St James' Park luh hi North London club tan fimkhur a ngai khawp ang.

Brighton (H) - May 13

Mikel Arteta nauten Brighton an mikhual hnuah hian Nottingham Forest leh Wolves te chauh hmachhawn tur an nei tawh dawn. Tuna an kal falna ang hi an chhawm nung thei a nih chuan Seagulls nen an inkhelh hunah hian champion theihna 'chance' a awm.

Chak chunga an champion thei dawn a nih chuan Gunners tan Brighton hi an huphurhawm hran lo ang. Chutihrualin Seagulls hma lama an khelh tur chhutin an dinhmun chinfelna tur match a nih a la rinawm loh, inkhel pawimawh bik erawh a ni dawn chiang.

Coach Graham Potter a chhuak a, forward ṭha Liandro Trossard pawhin Arsenal a zawm. Mahse, tun season chhungin Liverpool, Chelsea, Man United leh Arsenal an hneh vek! Alexis Mac Allister leh Kaoru Mitoma te an la nei tih hriat a ṭha.