Ronaldo-a'n goal 118 aia tam a khung thei dawn em?

Portugal-in zanin dar 1:15 hian Estádio José Alvalade, Lisbon-ah Liechtenstein an mikhual dawn. Euro 2024 khel tur zawnna chauh a nih avangin inkhel ropui tak a ni lo a, amaherawhchu Portugal coach thar Roberto Martinez-a'n khawvel player ropui zinga mi Cristiano Ronaldo a ko tel a, inkhel hian ngaihven a hlawh.

Euro 2024 qualifier group J-ah Portugal, Bosnia and Herzegovina, Iceland, Luxembourg, Slovakia leh Liechtenstein te an awm a, a sang pahnihin European Championship an khel thei dawn.

Inkhel tur chu

Portugal tan FIFA ranking-a 198-na Liechtenstein an hmachhawn dawn a, point thum an hlawh chhuah loh chuan mualphona a tling ang.

Inkhel hi Sony Ten-ah a en theih dawn a, online hmanga en dun tan Sony Liv-ah a en theih dawn. Portugal hian position tinah player ṭha an kawl a, Euro 2024 khel pha ngei tura ngaih an ni.

FIFA World Cup hnuhnung berah Portugal-in beisei an pha lo a, chutihrualin an tlarhmaah hian Ronaldo tel lo pawhin Goncalo Ramos (Benfica), Joao Félix (Chelsea), Rafael Leao (AC Milan) leh Diogo Jota (Liverpool) te an awm avangin buai tur an ni lo.

Kum 21 mi Ramos hian World Cup-ah khan vanneih vangin hattrick a siam ngawt lo a, tun season-ah Benfica tan match 36 aṭangin goal 24 a khung. Champions League-ah Benfica hian quarterfinal an lut a, Ramos hian goal sarih ngawt a khung.

Ronaldo leh Record

Portugal manager Roberto Martinez chuan kum a en leh thu a sawi a, Ronaldo tan chanchin lawmawm a ni. World Cup zawhah khawvel player ropui pahnih Ronaldo leh Lionel Messi ten chawlh mai an tum lo a, ram tana pet goal tam ber record siam an tum ve ve niin a lang.

Ronaldo hian ram tan goal 118 a khung tawh a, Messi hian goal 98 khung tawhin an inthlauhna hi goal 20 ni mah se Portugal striker record hi a him lo. Kum 2022 chhung ringawt khan Messi hian goal 18 a khung thei a, Argentine forward hi Ronaldo aia a naupan zawk bawk avangin record hi a la danglam thei a ni.

Hemi a nih vang hian Ronaldo tan tun hi record sawhnghehna hun ṭha a ni a, a vanneihna chu an group-ah hian a pet goal theihna ram Luxembourg an awm. Luxembourg lakah hian Ronaldo hian goal kua a khung tawh a; Bosnia and Herzegovina (2), Iceland (1) leh Slovakia (1) lakah pawh goal a khung tawh.

Mak ang reng tak erawh Ronaldo hian Liechtenstein lakah hian goal a la khung miah lo. Kum 2005 leh 2006 khan Ronaldo hian Liechtenstein hi a hmachhawn tawh a, bul a ṭan ve ve chungin goal a khung lo.

Tun ṭumah hian Ronaldo hian bul a ṭan dawn em tih hriat a la ni lo a, Fernando Santos hnuaia an match hnuhnung berah Morocco 1-0 in an hneh lo a, World Cup 2022-a an thlen chin chu quarterfinal a ni. Hemi ṭum hian Ronaldo hi bench aṭangin a lut a, tun ṭuma coach erawh Roberto Martinez a ni a, bul a ṭan a nih pawhin a mak lo ang.

World Cup hun lai khan Ronaldo hian club a nei lo a, Manchester United-a a contract neih chu an tihtawp sak. January transfer-ah Ronaldo hian Saudi club Al Nassr a zawm a, Saudi Pro League-ah match riat lek aṭangin goal kua a khung. Portuguese forward hian inelna sang ber chu khel tawh lo mah se goal khung dan a la thiam a, Liechtenstein lakah goal khung chhunzawm a tum ang.

Ronaldo chuan, "National team-a ka kir leh hi ka lawm a, Portugal tana ka khel leh thei tur hi ka lawm takzet," tiin twitter-ah a ziak a, a thlalakah pawh a hlim hmel. A hlim chhunzawm ang em tih chu zaninah a hriat ang.