Conte hian a sawi chian a ngai - Hojbjerg

Tottenham Hotspur midfielder Pierre-Emile Hojbjerg chuan tun hnaia player-te sawiseltu Spurs manager Antonio Conte a chhanglet a, Italian coach chu a thil sawiah chiang lehzual tura a duh thu a sawi.

Conte hian Southampton nen 3-3 a an inhnehtawk hnuin, na takin Spurs player leh club kalphung a sawisel a, khawthlang media ṭhenkhat chuan international break chhung hian Spurs chuan an ban dawn niin an sawi hial.

Hojbjerg chuan, "Conte kha a lungawi lo dawn tih chu hriat sa a ni a, press hmaah engmah zep leh i awm loin a ang chhuak a ni. Champions League quarterfinal lutin, FA Cup semifinal chu lut ila, kha thil kha a thleng kher lo ang.

"Team leh club kan nihna anga result kan hlawhchhuah theih loh avangin a lungawi lo a ni ber a, Premier League-ah chuan top four-ah la awm tho mah ila tun hnai result hian engkim a tiharsa a ni.

"Team anga hlawhtlin tum chuan, kan tum leh club nihphung tihlawhtling tura player inpe tak 11 kan mamawh a, chu chu ka hrethiam a ni," a ti a, Conte lungawi lohna a hriatthiam thu a sawi.

Hetihrual hian Hojbjerg chuan Conte chu chhangletin, "Mahse, a nihna takah chuan kan hmaah a rilrua awmte chu chiang zawkin a sawi turah ka ngai a, player-te pawh kan inenfiah thei dawn a ni," a ti.

Conte hian Saints nen an inhnehtawk zawhah khan, "Tottenham thawnthu chu hei hi a ni - kum 20 chhung club neitu hi a awm tawh a, mahse, eng nomawi mah an chawi lo. Hetiang renga kal an duh chuan an duhtawkin manager chu thlak rawh se, mahse, thil awm dan erawh an thlak chuang lo ang - min ring rawh u," a ti a, Spurs chu kalphung fel tawk loah a puh.

Spurs hian Conte an ban chuan club midfielder hlui Ryan Mason chu coach lailawk atan an ruat dawn nia sawi a ni a, Mason hi Spurs-ah hian first team coach a ni mek.

Hojbjerg chuan sawi zawmin, "Coach hi kan hnathawhah a lawm tawk lo a ni. Keimah bikah chuan player rinawm tak, keimah leh team tana 100% pe ṭhin ka ni. A thil sawi dan kha a thil hmuh dan a nih chuan, player-te pawhin uluk zawka kan ngaihtuah theih nan a sawichian lehzual a ngai a ni," a ti.

Hetihlai hian January-a Spurs chhuahsana Atletico Madrid zawmtu Matt Doherty chuan Conte a fak a, "Player-te hmaa a sawi loh chu press hmaah a sawi lo ang. A player-te lakah a rinawm em em a, club tan a theihna zawng zawng a hlan ṭhin - coach awm tawh zinga ṭha ber pawl a ni," tiin a sawi.