MLS All-Star enkawl tur Rooney

Kumin nipui chawlh laiin Major League Soccer All-Star leh Arsenal te an inkhel dawn a, Manchester United legend Wayne Rooney chuan MLS All-Star hi a enkawl dawn. Friendly match hi Washington-ah July 19 hian khelh a ni ang.

Kum 37 mi Rooney hian football khelh a chawlhsan hnuin coaching lamah a kal a, Derby County a enkawl hnuin nikum July thla khan a club hlui DC United a zawm. DC United hi an awmna Eastern Conference-ah 11-na an ni mek a, match li an khelh tawhah match hmasa bera Toronto FC an hneh bak chak an la nei lo.

Chutihrualin friendly match neihna tur hi DC United khelmual Audi Field a ni. Rooney chuan, "Kan league-a player ṭha rual enkawl a, Premier League-a team ṭha ber zinga mi Arsenal kan hmachhawn thei tur hi ka lawm. Ka coaching career-a hun pawimawh zinga mi a ni," tiin a sawi.

Mikel Arteta pawhin, "Season liam ta inpuahchahna atana United States kan tlawh kha kan hlawkpui a, tun ṭumah pawh hian kan hlawkpui leh ngei ka beisei. MLS All-Stars nena kan inkhel tur hi 2023/24 season atana fiahna ṭha tak a ni thei ang," tiin a sawi.

MLS XI hian kum 2005 aṭang khan Premier League club pasarih an hmachhawn tawh a, chung club te chu Fulham, Chelsea, West Ham, Everton, Manchester United, Tottenham Hotspur leh Arsenal te an ni.