France captain thar Mbappe

Paris St-Germain forward Kylian Mbappe chu France national team captain atan an ruat. Mbappe hian Hugo Lloris a thlak a, Tottenham goalkeeper hian January thla khan ram tana inkhelh a chawlhsan.

Kum 24 mi Mbappe hian France tan match 66 a khel tawh a, nikum World Cup final-ah khan hattrick hial siam mah se an ram a champion pui thei ta lo. Didier Deschamps chuan, "Kylian hian captain neih tur ang zawng zawng chu a nei kim a, khelmual chhung leh pawnah player danglam bik a ni," tiin a fak hle.

French Football Federation (FFF) chuan social media kaltlangin Thawhlehni khan Mbappe captain a nih tur thu hi an tichiang a, Atletico Madrid forward Antoine Griezmann chu vice captain atan ruat a ni.

Mbappe hi World Cup 2022-ah khan top scorer a ni a, an ram hi nomawi chawpui lo mah se World Cup 2018 final-ah khan Croatia lakah goal hnih khungin World Cup nomawi hi a chawi tawh thung.

France hian March 24, Zirtawpni zan dar 1:15 hian Netherlands an mikhual dawn a, March 27, Thawhṭanni zanah Ireland an hmachhawn leh thung ang.

PSG forward Mbappe hi kum 24 mi chauh ni chungin ram tan a captain thei a, Lionel Messi pawhin Argentina tan kum 24 mi a nihin captain hna a thawk ṭan. Chutihrualin Cristiano Ronaldo erawhin kum 22 a nihin Portugal captain armband a hreng tawh a, kum 23 a nihin captain nghet a ni.

Mbappe hian khelmual chhunga a chet ṭhat dan thlirin captain nih hi a phu a, chutihrualin Griezmann erawh captain atana en kan a nih avangin a lawm lo niin thuthang a awm. Griezmann hi kum 32 mi a ni tawh a, Atletico Madrid forward hian, "France leh Deschamps tan ka theihna zawng zawng ka hlan," tiin a sawi tawh bawk.

Amaherawhchu Deschamps-a'n hmathlir thui zawk neiin Mbappe captain atan a ruat a, Griezmann hi a hmin thei lo a nih chuan team chhung inlungrualna chhe ve thei a ni.