Infantino-a'n a hna ngai a chelh zel dawn

FIFA deputy secretary general Alasdair Bell chuan tun hnaia thubuai siamsak, an pawl hotupa Gianni Infantino chuan a hna ngai a chelh chhunzawm zel tur thu a sawi. 

Kar hmasa lawk khan FIFA president Gianni Infantino hi FIFA eiruk thubuai ngaihtuahtu Swiss attorney general Michael Lauber nen an lo inhmuh ṭhin avangin thubuai siamsak a ni a, an pahnih hian tihsual an neih loh thu an sawi thung. 

Infantino hian thubuai chinfel a nih hma chu a hna bansan rih lo turin thutlukna a siam a, FIFA deputy secretary general chuan Swiss attorney general hmuh chu thil sual a nih loh thu a sawi bawk. 

Bell chuan, "Attorney general hmuh hi thil sual a ni lo tih chu mi tam zawkin an hriain ka ring a, attorney general hmuh vang maia thubuai neih hi tuman an inring ngai lo ang," a ti a, Infantino a chhan. 

FIFA deputy secretary general chuan Infantino chuan thiktu a nei nia a ngaih thu sawiin, "He complain siamtu hi tu nge a nih kan hre lo a, Infantino tluchhe lai hmu duhtute an ni mai thei asin. FIFA President paih thlak duhtu an awm tihna a ni mai thei," a ti!

Kum 50 mi Infantino hian kum 2016 khan FIFA President hna hi a chelh ṭan a, thamna sum lak leh eiruk vanga Sepp Blatter hnuaia FIFA hming lo chhe tawh chu a siamṭhat tur thu a sawi a ni. 

June thla khan special prosecutor Stefan Keller chu Infantino leh attorney general Michael Lauber bakah he inhmuhnaa inhnamhnawihte laka 'complain' awm chhui chiang tura ruat a ni a, Keller hian complain ang ngei hian dan bawhchhiat a awm thu a sawi a ni. 

Kar hmasa khan Lauber hian a hna aṭangin banna a thehlut tawh a, ani hi court chuan meeting leh thil dang a zep niin an sawi a, amah chhui chiangtu supervisor-te chu dawt a hrilh nia sawi a ni bawk. Lauber hi a hna tawp hun tur tak chu August 31 a ni a, mahse thubuai siamsak a nih takah chuan a hun aia hmain a bang ta zawk. June thla khan Infantino hian Switzerland attorney general hmuh hi thil sual a nih loh thu leh, dan phal thlap a nih thu a lo sawi tawh thung - Lauber a bang a, FIFA erawh an insawifiah zel!

Infantino hian thiam lo chang ta pawh ni se, an pawl chhungkuaa eirukna thubuai ngaihtuahtu tur a lo hmuh lawk miau avangin a hming a chhe lo thei lo a, FIFA hmai bal tawh sa chu a tih balh belh ti pawhin a sawi theih. 

Bell pawhin thubuaiah chuan thiam an chan ngei a beisei thu sawi mah se an pawl hmel a balh phah tih a pha lo a, FIFA deputy secretary general chuan, "He thil thleng hian kan pawl hmai a ti bal a, a bik takin kan President zahawmna thlengin a khawih pawi a ni," a ti. 

Alasdair Bell chuan sawi chhunzawmin, "Eiruk thubuai avanga FIFA hmai lo balh tawhna hi zan khat thil thua tih reh theih a ni lo a, hun tam tak a mamawh ang tih chu thil chiang sa a ni. Mahse, tun anga thubuai kan nei leh ta hian a hnung zawngin min kaltir leh ta ti pawhin a sawi theih," a ti a, thubuai thar lam an nei chu pawi a ti hle.