Zaninah Mizoram Super League Final ; Zarkawt BCA hmaah Khatla TBL

A hun a thleng ta, tualchhung player ṭha leh basketball khel thiam bik awm khawmna team pahnih Zarkawt BCA leh Khatla TBL te chu zanin dar 8:00 hian R. Dengṭhuama Indoor Stadium, Mualpuiah an intawng dawn.

Mizoram Super League season 8 hmawr bawk a ni dawn a, game 1 aṭangin a hmuhnawm nghal ang. Best of three series hmanga chak zawk zawn tur a ni a, a bul ṭan ṭhat hi a chanve zawh nghal theihna a ni dawn.

MSL8 final hi Zonet chuan Zawlbukah live-in an pe chhuak dawn. Zonet pawt lo tan Zonet YouTube lamah en theih a ni bawk. YouTube-ah erawh man chawia en a ngai, thla khat chhung atan Rs 199 a ni - Zonet program dang pawh a en theih.

TV leh phone aṭanga en theih ni mah se, basketball ngaina leh tuichilh tak tak chu a hmunah an kal leh dawn. Mualpuiah hian lirthei dahna tur a ṭha tawk a, a chheh velah ei leh in tur pawh a awm ṭha hle bawk.

BCA an fimkhur

A zawnin Mizoram Super League nomawi vawi li an chawi thei a, vawi nga champion turin match hnih chak chiah an hmabak tawh. Sulhnu nei ṭha viau mah se Zarkawt BCA an ṭawng fimkhur hle.

BCA coach Lalruatfela (Afela) chuan, "Khatla TBL nen chuan kan inthlau lo tih kan hria, tu pawh chak zawk thei kan ni. Chutih rualin kan naute hian tawnhriat an nei ṭha, chuvangin inkhel boruak sangah ka ringtawk.

"Match dang ang bawkin kan ṭhat dan berin kan khel thei dawn, veng mipuiin min thlawp ṭha leh dawn bawk a, chuvangin hnehna chan ngei tumin game 1 kan khel nghal dawn a ni," tiin Vanglaini a hrilh.

Semifinal an khelh ṭumin coach Afela leh a player Zonunsanga te an inbakkaih deuh niin a lang, final-ah erawh Zarkawt BCA hian an player zawng zawng an chhawr tur thu coach hian a sawi - zaninah Zonuna a inlan ang.

Mission Veng Vikings tana MSL champion tawh, chumi hnua BCA hlawhtlin pui leh ngar ngartu Lalrina Renthei an nei a, ani hi player hmunawm tur bik zinga mi a ni dawn.

Lalrina chuan, "Final hi chu a boruak a danglam. Tun hmain final lo khel ve fo tawh mah ila a thar apiang hi a boruak a danglam zel," tiin atan chona a nih thu a sawi. Ani bakah captain Matthew Remtluanga Sailo hi mamawh huna 3-points lut thei tak a ni bawk - TBL tana ven ngai tur bik a ni ang.

Zarkawt BCA hian Joseph Allen an hmang thiam, ani hi basket bul hnaia che na thei tak a ni. Point a neih theih bakah rebound a la thei a, player dang tam hmun a siamsak thiam bawk, tualchhung player ṭhate nena an chetla a hmuhnawm leh dawn.

TBL an inringtawk

Khatla TBL hian Mizoram Super League nomawi hmasa pahnih kha an la, mahse a hnu lamah an la champion leh lo. Tun ṭuma team manager H. Lalhruaitluanga hi MSL3-a Mission Veng Vikings champion puitu kha a ni thung.

An ropuina neih let tumin TBL hian thapui an thawh, league round lamah erawh Zarkawt BCA hi vawi hnih an ngam lo! An chak lohna erawh a tlem ṭhin, a hmasa zawkah point hnih a ni a, a hnuhnung zawkah point thum a ni.

TBL manager Hruaia chuan, "Kan intawn hmasak khan kan khelh dan leh player bul ṭantu pawh a hrang ve ve kan ni a, mahse kan chak lo. Kan danglamna kha basket khat chauh te ni mah se a chak lo zawk kan ni tih kan pawm.

"Team ṭha hneh tur chuan kan insiamṭhat a ngai hle. Coach Vanlalnunsanga hoin theihtawp kan chhuah a, league round lama player khel thei lo ṭhenkhat an inlan dawn tawh bawk, game 1-ah hian chak kan tum," tiin Vanglaini a hrilh.

An intawn hmasakin TBL leh BCA an inkhel tawh hle a, hun tawp dawnah Eddie Zaithanmawia'n chiang taka luh tura ngaih lay-up a hlah a, point hnihin an chak lo, an chak lohna a tlem hle - chak an tum ngam pawh hi a mak lo.

Joshua Keys hi match khata point 30 bawr vel nei ṭhin a ni a, ani thlawp tur hian India camp lama koh tawh Vanlalṭhazuala an nei, anni pahnih hi BCA tan ven ngai tur an ni dawn - Eddie pawh ngaihthah theih a ni lo ang.

NE Olympic Games 2022 Most Valuable Player Vanlalrinchhana an nei bawk a, season hmasa MSL Defensive Player of the League ni thei Michael Liansanga an nei cheu bawk - champion turin squad an nei chhah ṭha tawk.