Murray hnehtu Lajovic

Nilaini zan Miami Open inkhelah Dusan Lajovic chuan Andy Murray 6-4, 7-5 in a hneh. Lajovic hian tun season hard court tournament bika a chakna hmasa ber turin world number 1 hlui Murray hi a hneh a ni.

Lajovic hi a khel ṭha hle, point hnuhnung ber hmu tur pawh hian vawi 16 ngawt ball an in pek tawn hnuah tawh a tha a la za zak zak hle, a match lehpekah chuan Maxime Cressy nen an inhmachhawn ang.

Kum 35 mi Murray tan chuan result ṭha lo a ni. Thla hmasa khan Doha lamah final hial a lut thei, amaherawhchu ṭha taka season hman chhunzawm a beiseina chuan a daih rei thei ta lo.

Miami Open khelh laiah hian Carlos Alcaraz pawh a inlan dawn a, vawiin hian a match hmasa ber atan Argentine player Facundo Bagnis nen an inhmachhawn ve dawn a ni.

Spanish rawlthar hian kar hmasa khan Indian Wells title a la a, world ranking lamah Novak Djokovic nek chhuakin a chung berah a awm. Tun tournament-ah hian atan champion chhunzawm a ngai dawn.

Alcaraz hi Miami Open champion lai a ni a, a title a hloh a nih chuan a ranking point neihsa pawh a chan nghal dawn, chuvangin inkhel loa awm mek Djokovic chuan a rawn lehpel leh daih thei, atan chak a pawimawhna a sang hle.