Lianzuala telna India-in Myanmar an hneh

Mizo tlangval Lallianzuala Chhangte telna India chuan Nilaini zan khan Hero Tri-Nation International Football Tournament-a an match hmasa zawkah Myanmar an hmachhawn a, an mikhual team hi 1-0 in an hneh.

Khuman Lampak Stadium, Imphal-a fans 30,000 chuang pungkhawm hmaah India tan Anirudh Thapa chuan inkhela goal awmchhun a khung a, Sunil Chhetri vanneih zan ni se India hi goal tam zawk khung thei an ni.

Manipur-a neih mek ram pathum inelna hi Inrinni zanah khelh leh chauh tur a ni a, zan dar 6:00-ah Myanmar leh Kyrgyz Republic inkhelin, March 28, Thawhlehni zanah India hi an inlan leh chauh ang.

India hian an match tawp berah hian Kyrgyz Republic an hmachhawn tawh dawn thung a, inkhel hi Star Sports 3-ah live-a pekchhuah ṭhin niin, online-a en duh tan Disney+ Hotstar-ah a en theih bawk.

Lianzuala telna

Fans 30,000 chuangin India an au phur a, Blue Tigers pawhin fan-te lawmna thlen tumin an khel - ISL Golden Ball dawngtu Lallianzuala Chhangte chu inkhel bul ṭantu zingah a tel a, Blue Tigers coach Igor Stimac chuan 4-2-3-1 formation a rawn hmang.

Rin loh takin ISL final khel chau, kum 38 mi Sunil Chhetri chu inkhel bul ṭantir a ni a, a hnung chiahah Mohammed Yasir awmin, mual sir aṭangin Lianzuala leh Bipin Singh ten an thlawp a, midfield laiah Anirudh Thapa chu tawlh hma hretin Manipur midfielder Jeakson Singh chuan defensive midfielder hna a chelh.

Stimac-a'n player a rem dan thlirin, goal khung a tum tih a chiang a, a inveng tel bawk. Myanmar lakah India mualpho pui a tum lo - an chak loh ngat chuan Stimac ban duhna thawm a ring leh dawn.

Tlarhnung laiah Chinglensana Singh leh Mehtab Singh an ding dun a, Akash Mishra leh Rahul Bheke te chuan full back hna thawkin, Bengaluru keeper Gurpreet Singh Sandhu aiah rin loh takin Amrinder Singh chu rin zawk a ni.

An ngam

Stimac-a duh ang ngeiin India-in inkhel ṭantir aṭangin an nawr nghal a, a bik takin Mumbai tana khel dun Lianzuala leh Bipin Singh an hmuhnawm takzet a, an tlan chak a, an taima a, tharum an ngah a, Myanmar tlarhnungin an chelh meuh lo a ni ber.

Mahse, player pahnih vanneih zan a ni lo a, an duh ber goal khungna hun an nei hleithei lo - tlarhmaah Chhetri erawh ball ṭha pek mawlh mawlh a ni a, Indian legend hi a vanneih zan a ni lo thung niin a lang.

Chhetri hian Anirudh-a siamsak chu crossbar chung lamah a tauh chhuak a, Lianzuala'n duhthusama ṭhaa a siamsak a chhuih goal loh pawh uiawm tak a ni - India captain hi a chuai ve ṭan ta em ni? tih chu zawhna awm thei tak a ni.

India goal awmchhun hi first half hun pek belha Anirudh Thapa khung a ni a, Bheke cross aṭanga ball kal chu Chennaiyin captain hian hmahruaina goal ni turin a khung.

India an chak

Blue Tigers tan Sunil Chhetri chuan minute 74-naah a khung belhah a inngai a, mahse, Thapa siamsak aṭanga a goal khung hi assistant referee chuan 'offside' tia ban a phar avangin pawmsak a ni lo.

Bengaluru striker hian hnai set sawt aṭangin ṭha zetin a tauh bawk a, mahse, hei pawh Myanmar keeper San Set Naing chuan keeper ṭha a nih tih pholan nan a hmansak a, India captain-in goal khung loin match a mangṭha.

Chhetri-a'n goal a khung lo a ni satliah lo a, mahni lamah a tilut ṭep. Aung Thu-a cross ṭha zet chu Chhetri hian tauh chhuah a tumna lamah mahni lamah a tauh palh a, Amrinder chuan ṭha zeta dangin India leh captain Chhetri a chhanhim.

Nilaini zan inkhelah hian Naorem Mahesh leh Ritwik Das te chuan India tana an match hmasa ber chu bench aṭanga lutin an khel ve ve a, ram tana an match khelh hmasak bera hnehna an chang thei hi an lawm khawp ang.

Duhthu a sam lo

India-in an match hmasa zawkah hnehna an chang nghal a, mahse, Lunglei tlangval Lianzuala chuan a khelh dan a la duhkhawp loh thu Vanglaini a hrilh - a aia ṭha zawka khel theiah a la inngai.

Lianzuala chuan, "Chak phu zawk kan chakah ka ngai a, chance pawh kan ngah tawkin ka hria. Ka mimal khelh dan bikah chuan duh angin ball ka hmu tam tawk lo a, ka hmuh chhunah erawh ka tichhe loah ka ngai.

"Chutihrual chuan hmasawnna tur hi chu a awm zel a, kha aia ṭha zawk khan ka la khel thei tihah ka chiang. Duhthusamin kan lamah ball kan chang tam tawk lo deuh a ni," a ti.

ISL hero of the league a nih miau avangin Lianzuala chungah mipui mit a fu a, Lunglei tlangval hi khel ṭha pangngai viau mah se a aia ṭha zawka khelh a la duh pawh hi a awm hle - beiseina a sang tlat.